tg-me.com/tajalzahraa1/83578
Last Update:
#محرم1446
سهم الجربه جتالي....الحرت اشلون ارده
امن الماي انجفه اگبالي.....دم گلبي تبده
عطشانات علوياتي بخيامي
واطشر لذيذ الماي گدامي
ودم گلبي تبده
...........................................
شبعت عطش وين العزيزه وشدتهن بهالظهر شده
من طولت يم الشريعه جي بيهن أحسب وحده وحده
وضليت عالبارد أدور اليروي الگلب حيل ويبرده
عله الراگ انحنيت
وبجيت اشگد بجيت
جاس بروده جفي
العلاوي بگد هواي
وشحط بالجربه ماي
اگولن ما يكفي
عندي أمن امس علويات عطشانه
أوين الاميره بالخيم تعبانه
والسگاي عد احسين بس آنه
شفته گوه گض عينه... امجلبات بعباته
نخاني الشيخ ابو سكينه... عله أميه لبناته
اجاني بنفسه شايل جربتي بيده
وشوفني اعله ايده الثانيه اوليده
ودم گلبي تبده
...........................................
ابيا زينب الجربه اترستها وشديتها حيل اعله گلبي
يامن يوصلني لرقيه واگعد واگلها عمي أشربي
اعليه الخيم صارت بعيده وشمات گطعو عني دربي
اوگفت رايد مجان
امر منه وآمان
ويضل بخير جودي
رخَه بوجهي اللثام
انلزم درب الخيام
وبديت أذكر وعودي
اول حرب تنزل بنصها ادموعي
لو بيدي اضم الجربه جوه اضلوعي
وين ام الابنين التحل موضوعي
خفت اهواي عالجربه.... من عمري لعمرها
عبدالله يبس گلبه.... وگاعد ينتظرها
شلته وجانت الدمعه بطرف عينه
من ليلة امس عطشان اخو اسكينه
ودم گلبي تبده
...........................................
لمن رموني السهم الأول دنگت عالجربه اشبگتها
أدني گتلها اعله گلبي اوحده امن الاعيون احسبتها
وضاگ الهوى البطف عليه لحدما ابخير آنه شفتها
الخجل ما خله حيل
بطيت اعله العليل
الابيضت لهاته
الشبع ضيم ونحيب
دواه يمي ويطيب
وايگوم لخواته
ابعز الظهر عالسجاد ضل بالي
وبكربله گلت ايطيب حسبالي
هذا الماي بس هوه ماكو اگبالي
ابنص شماتي وادعيله... بس ضليت حاير
اويامن ماي اوديله.... وعليّ هدت عشاير
وكل الحجي العلجربه سمعته اني
طشرو الماي واحد گال للثاني
ودم گلبي تبده
...........................................
قررت توني أرد امشي خطوه وما اشوف بس اسهام تمطر
واحد يصيّح گطعو ايده اواحد رگض مدري شيحضر
اواحد لمن خلصن اسهامه عالجربه گام احجار يشمر
ضحكهم عالي صار
واحس بجفوفي نار
واجت عيني اعله أديه
نقص شفت الادين
اگطعو ثاري اليمين
اودوها لرقيه
وجي جنت افكر بالخيم واحسيني
لهذا السبب ما حسيت بيميني
بغير ام عون ما أريدن اشغل عيني
وحضنت الجربه باليسره.... وهم گطعو يساري
بعد بيمن احاميها.... هنا صار انكساري
واحتاريت مدري اشلون اوديها
بزنودي اشبگتها وارگضت بيها
ودم گلبي تبده
...........................................
الگاع شبعت من جربتي ومن عدها ما شربت رقيه
تبدت شويه شويه مني وشامت وگف عاين عليه
اسمع يگلهم راح تخلص وعباس ما مندل أخيه
وگلت خي يا حسين
اريدك انته وين
اخوك انمرد جبده
جربتي امن السبيل
بقه بيها قليل
اعله گد علويه وحده
اخذ الجود يامولاي لأعيالك
حتى الشويه البي بقت لاطفالك
يطشرها رايد بالفله جتالك
مابيه وخذاني الدم... وصوتي راح مني
گلت ابعيد المخيم.... واخيي ما سمعني
ومن كلها انجفت واتبدت اگبالي
تمنيت اعله گد عبدالله يبقالي
ودم گلبي تبده
#أحمد #ماجد #الكلابي
BY 🌴تجمّع الزهراء ع العاشورائي🌴
Warning: Undefined variable $i in /var/www/tg-me/post.php on line 283
Share with your friend now:
tg-me.com/tajalzahraa1/83578