tg-me.com/oxgn313/2454
Last Update:
بالغربه وحدي "
بالغربه وحدي ... حانت منيتي
بدموعي ابدي ... اكتب وصيتي
شـابـت رمـوش العـيـن
مـحـتـاره ابـدي مـنـيـن
اكتب وصيتي
كل واحـد يـوصّْـي وأِخـوِتـه يـمّْـه ... لـو حـانـت مـنيته
وآنه بغربتـي وگلبـي انذبح حلـمه ... ولا واحـد لگـيـتـه
كلامي غير أخُوتي ياهو اليْفهمه ... والـدمـع الـجـريـتـه
شفت طيف الحُسين وهوه مذبوح
من كل صوب جسمه ينزف جروح
بكثر سـحگـت ضلوعه كتله لتروح
گتله حياتي ... خلصـت يغاتي
كل أمنـياتي ... تحضـر وفاتي
ابلا نحره شفته حسين
مـحـتـاره ابـدي مـنـيـن
____1____
بين دموعي بين اللوعه والحسره ... أدوركـم يالاخـوان
أحشمكم تحـضروني وأهـل عـبره ... مـوتي گـرّب وحان
اليفگد أخْوِتهْ أوياهم فگد عمره ... بروحه بيت الأحزان
صرت شـمعه وعليه اتهب الارياح
أريـد بـموتـتـي بـشوفـتكـم أرتـاح
وتشيلون الدمع من عيني لو طاح
مشتاگه ألكم ... وأذكـر حـچيكم
يابعد أختكم ... ابقـى انتـخيـكم
عـيـنـي جـرت نـهـريـن
مـحـتـاره ابـدي مـنـيـن
____2____
وصيتي لو اموتن ماي لـترشـون ... زحمه حسين ضامي
وچفنوني بعباتي البيها دم امتون ... والسـبحه وهـيامي
وحچي هوايه يعيش بْگلب الاعيون ..مـااوصفه بكلامي
وأحـاچـي دمْعتـي لا مـا نسونـي
اخوتـي بـالـدرب هـسـا يـجـونـي
يشـيـلون النـعـش ويــشـيـعـوني
وفوگ اعله گبري ... رايــة تــرفــرف
خـلّـصـتـه عـمـري ... واحلامي تنزف
نـــار الْـفـــگِـد نــاريـــن
مـحـتـاره ابـدي مـنـيـن
____3____
أريد حسين يحضرني وأشوفنه ... واضمّـد كل جروحه
يسولـفلي وأسولفله واشـبگـنه ... وتحظن روحي روحه
بشوفي يرتوي وآنه اترتوي منه ... الحزن بعيوني لوحه
اجروحـي مستهلـهن كـاتـبـنّـه
الحوافر يوجعنـي ويـوجعـنّـه
أنشد دمعـي لـو يـاْهـوّه عـنّـه
بفـگـد الأحـبه ... عـشـت بـنيـاحـه
والغربه صعبه ... وماكو استراحـه
شـام وغُــرُب جـرحـين
مـحـتـاره ابـدي مـنـيـن
____4____
واريدن صاحب الرايه يجي ليّه ... أشـبكـنـه واحـاچـيه
واگلّـه يـا بعد أختك العلويه ... شـلونك" وابقى اصد ليه
اريـد احچـيلـه ضـيم اليخنگ الريه ... لا خـافـن ابـچـيه
أگـلّـه رايــتك خلـها اعلـه گبـري
مـتنـي يـنلـچـم بـالـگــبـر تــدري
من السوط احس مكسور ظهري
لا ما اگلّه ... كـل ظهري حدّب
دمعه يهلّه ... لـو تبـچـي زينب
بــعـده لـفــانـي الـبــين
مـحـتـاره ابـدي مـنـيـن
____5____
#رزقهم_سلام_الله_عليهم
#احمد_رزاق_الاعرجي
BY الشاعر احمد رزاق الأعرجي
Warning: Undefined variable $i in /var/www/tg-me/post.php on line 280
Share with your friend now:
tg-me.com/oxgn313/2454