tg-me.com/mahaAlkhagane/11635
Last Update:
#للأربعين
#الشاعرة _مها الخيگاني
تركنة الشام يبن امي وإجينة اردود
إجينة ولا ولي العدنة إلحملنة يگود
إجـينة و مـا لـگـينة
أخو إيتاني الضعينة
گوم يحسين .. گوم يحسين
❁ــــــــــــــــــ•🌿•ـــــــــــــــــ❁
خوية أنهض يالـعشت قـصة عذابي
ارد اسولفلك عله اجروحي ومصابي
راح اطش اعله الگبر حزني وعتابي
بـلكي تـگعد حـته اسـمعنك جـوابي
عـمـر خـلّـص نـوايح
أجيت وحملي طايح
ياضـوه العين .. ياضوه العين
❁ــــــــــــــــــ•🌿•ـــــــــــــــــ❁
يابعد عيني ونظرها اليوم أجينه
ردنه عـوانـه الحمـلـنة وما لگـينه
ياهضيمة إلي ذبحكم يحدي بينه
إمـن السياط امـتونة تشبه عبينه
جـرح يلچم وداعك
تره ضعنه إبضياعك
خوية إلـحنين .. خوية إلـحنين
❁ــــــــــــــــــ•🌿•ـــــــــــــــــ❁
خوي من بعدك ضعت والروح شاغت
عـيني بالـشام اشـكثر لـوعات شافت
والله احس الدنيا چنها ابعيني ضاگت
بـيـن غـربة و آنـه كـل احبـابي مـاتت
وحيدة ومالي والي
بـعــد عِــزي ودلالي
ما الي معين ما الي معين
❁ــــــــــــــــــ•🌿•ـــــــــــــــــ❁
لا معين اليفزع إلنه ولا كو ناصر
وآنه مـحنيه بهضمـتي بـس اكـابر
باليسر دمعي رسم صورة مـشاعر
حـرمة مـاعدها ولـي بـين العساكر
چـنت عـدكم امـيـره
بعدكم صرت اسيره
هضمني البين .. هضمني البين
❁ــــــــــــــــــ•🌿•ـــــــــــــــــ❁
مـا رحمني البين بيكم مارحمني
والوكت يحسين بيكم مـاجمعني
چـان كـل حلمي اشـوفنك تضمني
أگعد احچيلك عله السوط الهضمني
صحت ياخويه وينك
اجــيـت ابـأربـعـيـنـك
بيّة نارين بيّة نارين
❁ــــــــــــــــــ•🌿•ـــــــــــــــــ❁
🖇تـمــت بتـــوفيــــق الله
بـٲنـامـل شاعرة ٲهـل البيت عليهم السلام
🖊 الشـاعرة مـهـا الخـيـگاني
وغير مبري الذمه ٲمام الله واهل بيت محمد((ع)) من يحذف الاسم وينشرها ٲوينسب القصيده لــنفسه 🚫
💬ونسال الله التوفيق والقبول
وٲسالكم الدعاء
https://www.tg-me.com/us/الشـاعـرة مـهـا الخـيـگـاني/com.mahaAlkhagane
BY الشـاعـرة مـهـا الخـيـگـاني
Share with your friend now:
tg-me.com/mahaAlkhagane/11635