【居民共議計劃更新】

之前我哋十位議員一齊推出「居民共議」，好多謝大家都踴躍填我哋推出嘅問卷，收到好多對區內巴士路線計劃嘅意見！我哋總共都收到300幾份，當中見到大家對幾條新線都有各式各樣嘅意見，甚至有唔少朋友會畀反建議。我哋將大家嘅意見都整成咗一份報告，如果大家想詳細睇報告，可以睇Comment嘅連結；我哋已經將報告交咗畀九巴同埋運輸署詳細參考。

一路睇大家意見嘅時候，都發現一個現象：當每一個班次調動，或者走線更改係益某一區而影響咗另一區嘅乘客嘅時候，各區之間好似就無可避免地意見相左，到結果好似就係形成一個互相競爭交通資源嘅局面。區議員嘅角色當然係要為自己嘅選區發聲，但我哋同時亦都係「大埔區議員」，既然喺大埔作為多數，都好希望謀求全大埔嘅福祉。與其喺地區入面中政府嘅伏，花費所有心力去玩一個零和遊戲，我哋更加需要嘅係同心合力咁為全個大埔爭取更多資源。

咁可以點做呢？集合全大埔嘅力量，其實可以做好多嘢，例如一齊數車啦、一齊砌交通習慣問卷啦、一齊整民間交通報告啦......上次嘅問卷都有唔少朋友留低咗電話，我哋遲啲可以一齊傾傾，我哋相信大家嘅智慧，集合埋一齊可以好犀利。如果上次留低過Contact，我哋會whatsapp/signal聯絡返大家；如果上次未留低Contact嘅人有興趣，歡迎你pm我哋。

#公民參與 #始於足下 #居民共議 #大埔