tg-me.com/clerk22/7025
Last Update:
ايه اصل شم النسيم، وهل فعلا هو احتفال شعبي مصري أو لا ؟
طيب في البداية لازم تعرف أن المصري القديم كان بيقسم السنة على ثلاثة فصول مش أربعة زي ما موجود دلوقتي، طب ليه ثلاثة فصول بس !! قالك على حسب المحاصيل، فقسم السنة اللي كانت اسمها " رنبت " إلى ثلاثة فصول رسمية
اول فصل كان الفيضان اللي هو بيعتمد عليه اعتماد رئيسي في الزراعة وكان اسم الفصل ده " آخت " 🌊
بعد كده الفصل الثاني اللي هو بذر البذور وكان اسمه " بريت "
أما الفصل الثالث والاخير هو فصل الحصاد وكان اسمه " شمو "🥀🌺🍀
واللي بيتم فيه الاحتفال بعيد الشمو اي عيد الحصاد وهي الكلمة اللي اتحرفت فيما بعد وبقى اسمها شم وأضافوا ليها اسم النسيم فأصبح العيد ده معروف بإسم شم النسيم واعتبروا المصريين اليوم ده بمثابة بعث جديد للحياة والامل كل سنة فكانت الازهار والورود تتفتح وانتشار الخضرة كان بشرة خير انه بداية الحصاد 💚💐🌸
وكان اليوم بمثابة عيد فسجل المصري القديم نقوشه ومناظر احتفاله على جدران المقابر لتخليد ذكرى اليوم ده وكانوا بيخرجوا للحدائق للاستمتاع بالزهور والورود وكانوا بياخدوا معاهم اكلهم وشربهم وكأنها عيلة مصرية في يومنا هذا بتحتفل بشم النسيم ❤️
وكانوا المصريين القدماء يحبوا ياكلوا في اليوم ده السمك المملح *الفسيخ* والبصل والخس وغيرهم من الاكلات اللي لسه محتفظين بيها ليومنا هذا وكلنا بنحبها، طب ليه السمك المملح، قالك عشان السمك بيرمز للنيل وهم كانوا بيحبوا النيل وبيقدسوه فكان السمك عندهم من الاكلات المميزة اللي لازم تكون على مآدبهم في أي احتفال، والسمك المملح بالذات كانوا بيحبوه عشان فوائده زي أنه بيوصف للوقاية من أمراض الحمى الربيعية وده اللي تم ذكره في بردية ايبرس الطبية 🐟
طب ليه مرتبط بعيد الفصح المسيحي أو اليهودي ؟ يوم الشمو المصري بيصادف أنه تاني يوم من عيد الفصح المسيحي " قيامة المسيح " أما الفصح اليهودي فهو يوم بيحتفلوا بيه بخروج سيدنا موسى وبني اسرائيل من مصر واللي بيصادف برضه انه قبل شم النسيم بيوم واحد
فكل سنة وكل مصر بخير بمناسبة عيد الشمو 🌺🥀🍀♥️
BY كاتب مجهول
Warning: Undefined variable $i in /var/www/tg-me/post.php on line 283
Share with your friend now:
tg-me.com/clerk22/7025