tg-me.com/AsoaatHoseneua/6070
Last Update:
كلبي المجروح يمه
الفركاك اينوح يمه
بيه اشسوه فركاك وديت اربعه وياك
*******
ودعتك ونار الحزن تجويني
ومن فركتك ما كمت اشوف بعيني
ينطيك كلبك تمشي وتخليني
يحسين لجلك كبريت ابنيني
وادري ايوفون يمه
وراح ايضحون يمه
كل الولد تفداك وديت اربعه وياك
********
يحسين اسمك يسري ويه الانفاس
جنت امن اشوفك انسه وجه العباس
عطر الحبايب احله من عطر الياس
تدري بغيابك يبني شيبت الراس
يمته الغياب يمه
ايدكون الباب يمه
ضل ابالي ذكراك وديت اربعه وياك
************
ارجع ييمه وشوف عكبك حالي
لمن عفتني ضل مكانك خالي
ام البنين وحسرتي بدلالي
اشلون اصبر وعن عيني راح الغالي
بهجرك يحسين يمه
بجيت العين يمه
ضلت روحي ترجاك وديت اربعه وياك
******
يا دنيتي وروحي وحياتي وعمري
وانته الهوه يحسين عندي اليسري
حدب ييمه امن المصايب ضهري
كل يوم اذكرك والمدامع تجري
بصدري الالام يمه
وظلمه الايام يمه
لا تنسه وانساك وديت اربعه وياك
************
عفتوني وحدي وبيه تغلي النيران
والبيت بيكم كل وكت يزهر جان
كمت انتظر طارش يدك البيبان
ما ينحمل ياروحي فكد الوليان
كل لحضه اشتاك يمه
ما بيه افراك يمه
تدري بكلبي يهواك وديت اربعه وياك
*********
يحسين عكبك كلي شيخلصه الليل
وانه ادري باجر صدرك اترضه الخيل
طيحت اخوك بكربله اتهد الحيل
ودم نحرك اشكد عالترب راح ايسيل
ايدوسون اعليك يمه
وتنهض ما بيك يمه
وتطحن جسمك اعداك وديت اربعه وياك
*********
تمت
تحسين الخفاجي
BY إبداعات حسينية
Warning: Undefined variable $i in /var/www/tg-me/post.php on line 280
Share with your friend now:
tg-me.com/AsoaatHoseneua/6070