الحمدلله
مرت سنة وبعده الگلب
الحمدلله
ما صار اله غيرك درب
الحمدلله
واني بعدني عالوعد
.
منهد ما صرت الي حبيب
اتغرب كلبي يالغريب
وما لحضه ناسي اضعونك
.
كضن يا ابو علي السنين
كلبي يدك حسين حسين
هيمني حب اعيونك
………………….
يا ابو الاكبر
اامي الكضه وياها العمر
يا ابو الاكبر
التعبت علي امن الزغر
يا ابو الاكبر
انساها من اسمك يمر
.
امي وروحي وكل هلي
الك فدوه يا ابو علي
غيرك ما الها عيوني
.
لحد ما اشيب كون اضل
الكلبي تبقى انت خل
وبس حبك ياخذ لوني
………………..
بالفطره احبك
وبالفطرة الك كلبي انكسر
بالفطرة احبك
وهنياله البحبك ضفر
بالفطرة احبك
يمضحي بالغالي الي
.
بكل شده وبكل وكت
تبرالي وعندك اخت
متيسره بديرة غربه
.
ودرب الشام اصعب درب
كل خطوة اتهد الگلب
الوحدها تمشي صعبه
…………………
ما عندي غيرك
وغير البجي لمخيمك
ما عندي غيرك
كل ذكرياتي بمأتمك
ما عندي غيرك
تشهد رقيه بهاي الي
.
البحبها كضه صباي
تشهد لو شفتلي ماي
ابجيك بكسرة خاطر
.
العطش ويلي العطش عذاب
وانت غافي عالتراب
ومر فوك اضلوعك حافر
…………………..
لذة حياتي
من ابقى من كل كلبي اون
لذة حياتي
اتحسس بكلبني الحزن
لذة حياتي
بس بالبواجي والنعي
.
المحبوبه ضامي وذبيح
وعلى حر الترب طريح
ما تحلى بعينه الدنيه
.
وما عندي غير النحيب
على اغلى واعز حبيب
مولاي العشت بفية

مقدمة عزاء


هل اهلال عاشور
وين الگلبه مكسور
ودمع عيونه منذور
للحسين
………………………………….
هلْ الحزن يهل الحزن وين الكضاها بحسرته
وين المرخص دمعته بس للحُّسين وكسرته
المكظي ايام العمر ينعى لخيامه وغربته
اليطيح كلبه لو سمع مولاه هوى من مهرته
.
وين الذابحه الشوك
ومثل خيامة محروك
وكلبه بحزنه مخنوك
للحسين

………………………………….
بيام عاشور الحزن يرف مثل رفة علم
للغزرت بيه دمعته للخيم ولراعي الخيمّ
عالمنكسر كسرة غصن لحسين ولذاك الالمّ
وينگطع كلبه لو سمع محبوبه مصيوب بسهم
.
الحط حسين بالروح
وكلبه بجرحه مجروح
وحلاله اللطم والنوح
للحسين
…………………………………..
يالتهوى الحسين وتحس طاريه الك مثل الهوه
جم ليلة واجفوف العدو تكطع الماي بنينوى
ويدير عينه اعلى النهر ويتهافت بعينه الضوه
اوحش الفلا منه ارتوت وحسين منه ما روى
.
من الماي محروم
بهم عياله مهموم
مات وهو مهضوم
الحسين
………………………………….
يالتنتظر شهر الدمع كوم بدموع استقبله
ايام وحسينك يضل وحده غريب بكربله
ايام ويمر مسمعك حسين طايح بالفلا
عريان وخيول العده متحزمة اجت تركض اله
.
نايم على التربان
من الشمس ذبلان
اويلي وضال عريان
الحسين
………………………………..
مثل المضيع من يون ون كون ونك ينسمع
لازم تشوفك فاطمة مكسور وتهل الدمع
صح ما ترد خيل العده من تدك حيل اعلى الضلع
بس لا تخلي فاطمة الوحدها تبجي وتنفجع
.
الطم حيل الضلوع
وابجي وطيح الدموع
گلب فاطمة مفجوع
للحسين

يا فاطمة
شتسوى حياتي بغير الحسين
ابلاية خدمته وين امشي وين
اخدم واصب دموعي عليه
الدللني وامسى ابلايه معين
.
مولاتي اسمه كل ما ذكرته
كلبي يكضني واذكر غربته
وما بيدي شي غير ابجي وانوح
.
حسرة وحقج مولاتي حسرة
ابنج ذبيح وخيل اعلى صدره
وانه ادعي حبه وبيه روح
.
يا زهراء
شمسوي حتى اترجه قبول
شنهي البواجي وشما تطول
شنفع الدموع ولطم الصدور
وصدر الحسين اطحنه الخيول
يا زهراء اغثيني
……………………
يا فاطمة
لمن كبرت بعمري ووعيت
لاجلي الحسين اتغرب دريت
كلشي كرهته بهاي الحياة
وما منولد يا مولاتي ريت
.
يا فاطمة كالو باقي عاري
فوك الرمل بشموس الضهاري
حتى انه اعيش براحة وسلام
.
بيا راحه اعيش ويدري ضميري
فوك الرمال اتوسد اميري
عالمثلي طعم الراحة حرام
.
يا زهراء
ذيج المهابة وذاك الجمال
مولاتي باقي فوك الرمال
حتى بكرامة المثلي يعيش
ويكضي سنينه بخير ودلال

……………….
يا فاطمة
مولاتي كل ما زرت الضريح
ما ادري المن دمعي يطيح
لضلته وحيد ابين الخيول
لو على كلبه الضامي الجريح
.
مولاتي هاي التتسمة شدة
الخيالة كثرة وضل هو وحده
ومشبوحه عينه صوب الخيام
.
ويدري عدوه ما بيه شهامه
وبطيحته يحركها خيامه
وتفر بناته فرة الحمام
.
يا زهراء
اتعنتله من كل صوب السهام
وويلي اعلى وجهه طاح الامام
طاح الشهم واعيونه تشوف
الخيالة ركضت صوب الخيام
…………………..
يا فاطمة
شما تبجي عيني وزاد النحيب
جرح الشهامة ماله طبيب
لمن فتحها عيونه الحسين
شاهد خيامه يمها غريب
.
گلب الغيور تكتله الهضيمة
لو اجبني تگرب يم حريمه
تكتبه حميته يام الحسن
تنزل دمعته مولاتي دم
.
مولاتي ابنج الله اكبر
بعينه يشوف التم المعسكر
خيل ومشاعل بم الخيم

يا زهراء
هذا الجرح ما ترهمها طيبه
حسين ويشاهد زينب غريبة
لو تبجي دم اعيون الخليقة
محد يوافي هاي المصيبة
……………….
يا فاطمة
ما همهه اخته وراحت تشوف
ركضت عالتل مليانه خوف
يلمحها من ابعيد الحسين
متوجهه صوبه تحرك الجفوف
.
شكد صاحت شكد شالت ايدها
لجن اخوها ما رد عليها
منعت اخوها عنها الجراح
.
كوة تحمل شالاها ايده
يوملي الها لكن هي بعيده
شما جفه شاله يرد جفه طاح
.
يا زهراء
من صاحت وما سمعتله صوت
زينب على التل رادت تموت
هو عليها بالحسرة مات
وهي كتلها هذا السكوت
.😭

قصائد الليلة الثانية

القصيدة عن اسم مولانا ابو عبدالله صلوات الله عليه


لمن ردت افتهم معنى السعادة
اسمك لفضته ولگه گلبي مراده
صرت اسعد انسان
لمّن بجيتك
گلبي الخشن لآن
لمّن بجيتك
……..
كل ذكرياتي بهل الاسم . كلشي بحياتي منه
مره يخليني ابتسم . ويكتلني مره حزنه
.
انت الردت گلبي يحب . ويحزن الك يامولاي
وينكسر لو جاسه عطش . ولو ردت اشرب الماي
.
اسمك . جاباني امن ايدي وكلي ابجي لعطشانك
اسمك . هو الدلاني وين يصير مجانك
اسمك . جسد حسرت الغربة وكل احزانك
.
وهذا اني متعود امن الطفولة
گلبي يتحسر اذا اسمك اكوله
امن اسمك يعطشان
همت وهويتك
وصرت اسعد انسان
لمن بجيتك
…………………………..
قال الامام الحسين عليه السلام
(انا قتيل العبرة . لا يذكرني مؤمن الا بكى)
كامل الزيارات


ما مؤمن امن اذكره . طاري اسمك وبجاله
من الله هايه للخلق . اعظم واهم رسالة
.
معناها مشروط الدرب . لله بدمع مصابه
هذا حبيب الله وغدا متوسد الترابة
.
المؤمن : اليتحسر من يذكر اسمه ويبجيله
المؤمن : اليسعد كلب الزهره ويكعد ينعيله
المؤمن : الينهد حيله من يسمع رايح حيله
.
وسفة اذا يغلى دمعي لمصابك
ولخاطري بهيمة غافي ابلا ثيابك
الهيمة هواها
حار اعلى ريتك
وصرت اسعد انسان
لمن بجيتك

……………………….

اشكد عظيم وبيه حرت . اسمك يمحبوب الگلب
العباس ما گاله ابد . الا وگع فوك الترب
.
بدر الهواشم والثقة وكافل حراير حيدر
وما كاله بس مره لمن جسمه هوى فوك البر
.
صاحك: باسمك وبگلبك فزت فرحة خوه
صاحك:باخر لحضه من صار افراكك كوة
صاحك: من ما ضلت بالدنيه كطرة نخوة
.
يعرف قدر هالاسم راعي الكفاله
والا منيته اجته يالله گاله
ابادابه مولاي
ترحمني ريتك
صرت اسعد انسان
لمّن بجيتك
………..
هذا الاسم بجى علي . وام الحسن بجتله
الزهره ما مرها مسه . الا بحزن نعتله
.
من جابته لهسه تون . وتبجي بحزن كسيرة
اوليدها لب الگلب . لموه بالحصيرة
.

الزهره . تحرگ كل الدنيا امن تون حسرتها
الزهره . اسم حسين لوحده يطيح دمعتها
الزهره . مكسورة وبس الله اليدري بكسرتها
.
يا حسرة امه المها وحزنها
بالهيمة شافت تبدى لبنها
وياها للنوح
متعني اجيتك
وصرت اسعد انسان
لمن بجيتك
……………………………

هذا الاسم صاحه گلب . من حركو المخيم
گلب العقيلة المنجرح . الدمعته تجري من دم
.
شكد صاحت بهذا الاسم . امن الخيل اجت عليها
شكد صاحتها من الحبل . التف على اديها
.
خويه : يحسين شكد صاحت من ركضت بالبر
خويه : شكد صاحت من ناكتها الهزله تعثر
خويه : يحسين اتبدل مركب لبوة حيدر
.
حسين شكثر صاحتك ام المصايب
بالعاشر وباليسر او بالخرايب
وياها مولاي
اصيح ونعيتك
وصرت اسعد انسان
لمن بجيتك

بعد لو اعيش عمرين
وينطيني الله گلبين
حرام ان جان العيون
تعشك غير الحسين
.
محبوبي . واتنفس باسمة
محبوبي . مولاي ابو اليمه
…………………….
امن الدنيه ريح الغربة هب
زغِير وخذه گلبي التعب
وگلبي نخه الخله وهب
يشمر صليبه
.
واتبدل بساع الهوه
وطلعت شمس من نينوى
ومنها دخل گلبي ضوه
اطاني هيبة
.
حسيت توني منولد وصارت الي روح
ردت افرح بحبه ولكيته گلبه مجروح
وبراحة عيشني وسعادة وهو مذبوح
.
عيشني احسن الناس
وخلاني ارفع الراس
بس ضل هو مكسور
من فراك العباس
.
بحنيته . صرت الهوه اشتمه
محبوبي . مولاي ابو اليمه
…………………………..
لمن قريته بالكتب
شفته امير وكله حب
وبساع يدخل للگلب
من كد حنانه
.
وشفته وحيد بنص غرب
من مهرة طايح عالترب
ومحروم من ماي الشرب
اشفافه ذبلانه
.
محبوبي ابو حلو الملامح فوك التراب
ذاكه الجمال الهاشمي بحر الشمس ذاب
ويلي واجه صوبه العدو سلاب سلاب
.
حب اتلون باااه
بحسره عايش اوياه
حسيته بجلمتين
ويلي حسين ويلاه
.
حسراتي . للرخصو دمه
محبوبي .مولاي ابو اليمه
…………………………
بين الشمس بين الضمه
وافراكه عن مخيمة
محتار گلبي بفاطمة
امه الحنونه
.
لمن اجت وتعنته
عريان ابنها شافته
اوليدها وما عرفته
مغيرين لونه
.
شافت ابنهه الربته عاري بلا هدوم
والخيل والحر والعطش مغيرات الرسوم
وليهسه ام حسين تبجي بگلب مهضوم
.
مضيعة وتجري دمعات
وتفتر عالعزائات
تموت الناعي اذا گال
حسين امن العطش مات
.
وتگابله . الصب دمعته بهمه
محبوبي . مولاي ابو اليمه

………………………………
اقره ولكيت اخر جرح
خدر اخته شافاه ينذبح
هي بهزل هو برمح
ماتو سويه
.
يصد الها وادموعه تهل
كل ما تعثرها الهزل
ويشوف ايدها بالحبل
هي ورقية
.
حسين طلعت روحه مو من رمح وسيوف
مات بوكت شاف العقيلة جفها مجتوف
عالرمح ويشوف الحبل يجرح بالجفوف
.
جرح ما صحله طيبه
عيشني بنحيبه
جرح كل الليالي
زينب يا غريبة
.
يا جرحي . يا طيبة التلمه
محبوبي . مولاي ابو اليمة
……………………….
مختصر هذا عن عشك
ما اكدر اوياه افترك
من زغري بيه گلبي يدك
وتبجيله عيني
.
ما عندي حب غيره الي
هذا الحبيب الاولي
مولاي اميري ابو علي ت
لذة سنيني
.
الحمدلله على حبه ودمعة العين
وان شاء الله كل عمري اضل خادم للحسين
لو مو دمعتي لغربته انطي الوجع وين
.
هذا الحب خذاني
بغربة عيشاني
ما اكدر بدونه
اتنفس ثواني
.
حب غيره . ما اكدر افتهمه
محبوبي . مولاي ابو اليمه

كل الهلا بجيتك علينه بهل الضعن
مولاي مولاي
يرخص عمرنه كبال ضعن ام الحسن
مولاي مولاي
خدامك ونحسب ليالي لخدمتك
الدنيه غربة وخدمة اضعونك وطن
مولاي مولاي
…………………………
خدامك ومنطين للزهراء عهد
مولاي مولاي
ما بينه واحد كوفي ويخون الوعد
مولاي مولاي
ادخيل جون ادخيله رب المعرفه.
كل ما خدمنه نكله يا جون المدد
مولاي مولاي
………………………….

بام البنين احزام خدمتنه انعگد
مولاي مولاي
كل خادم ام عباس صارتله سند
مولاي مولاي
مدينه ادينه لفاطمة ام الكمر
وحاشه يرد وخاليه اجفوفه احد
مولاي مولاي
………………………
بالرحمة ذيج الخلت الحر كلبه حر
مولاي مولاي
خلينه خدامك نضل طول العمر
مولاي مولاي
ولمن تضيع الناس دربك سيدي
خلينه يا مولاي للخدمة ذخر
مولاي مولاي
……………………….
من هسه يبن الزهره متحضره الخدم
مولاي مولاي
لبسو سوادك وانعلن حزن الخيم
مولاي مولاي
من هسه نلطم على حيرة زينبك
الحيرها لمن طاح شيال العلم
مولاي مولاي
…………………………

اهلا وسهلا :
بجية حبيب ام الحسن
اهلاً وسهلاً
بالضعن وبراعي الضعن
اهلاً وسهلاً
بلجاي گاصد كربله
.
يستقبلونه
هيج الي يكصد للعرب
يستقبلونه
وينطونه كلشي شما طلب
يستقبلونه
ببيوتهم مو بالفلا
.
اليعتني للعرب . وجايب ضعونه
بيالهلا ومرحبا . يستقبلونه
مو بنص الفلا. ايعطشونه
.
تلگتك كربلاء بالضمة حسييييييين
وانجرح گلبها فاطمة حسييييييين
………………….
بالغاضربة
بمدللاتك خيمت
بالغاضرية
بحر الصحاري غمضت
بالغاضرية
وانت حبيب ام الحسن
.
وابن الدعية
مرتاح نايم بالقصر
ابن الدعية
الهوه البارد بيه يمر
ابن الدعية
اعيونه مرتاحة غفن
.
.هذا صيف وجمر. شمس الضهاري
وخيمت بالحرم . بذاري البراري
وتدري حار الهوه . يمر بالصحاري
.
خيمت بالشمس بالخيم حسييين
والعطش كسر گلب الحرم حسييييين
…………













……………

المعتنيهم
بگلوبهم ماكو رحم
المعتنيهم
سدو الماي اعلى الحرم
المعتنيهم
كتل الطفل عدهم سهل
.
ما يرحمونك
محضريلك اطول رمح
ما يرحمونك
وباجر بديهم تنذبح
ما يرحمونك
الخلو دمع عينك يهل
.
باجر بكربله . من تبقى وحدك
تبقى ضامي الگلب . ولا اخو عندك
تنذبح بالفلا . وينهضم جدك
.
اكباله من الكفة تنذبح حسيييين
وبدليلة جدك ينجرح حسيييييين
……………………
وامدللاتك
من يكضي عاشر كربله
امدلاللتك
ما تبقى وحده مدللله
وامدللاتك
يتاسّرن باقسى درب
.
فوك الهزايل
يتأسرن يا ابو علي
فوك الهزايل
يحديهن اليكره علي
فوك الهزايل
ويدخلن اديار الغرب
.
يا حسين الضعن . تحديه اجانب
ونومته وراحته . فوك الترايب
ضعنك الهاشمي . طب الخرايب
.
امن شوكت تشوف اهلك غرب حسيييين
وشوكت غفن فوك الترب حسيييين

كبال ضعنه يمشي ابا عبدالله
والهواشم والحرم تمشي وراه
فجاه شال ايده وابو فاضل اجاه
كله يا ابن الزجية شتأمر
.
كله يا عباس هاذي كربله
هذا مگصنده النوينه الممشى اله
انصب اخيام الستر للعايله
الله راد اهنا نخيم يا بدر
.
ااستمع وانحنى عباس الشهم
وباشارة ايد لمّْ كل الزلم
َبلَغْ الفرسان بالامر المهم
والغيارى نصبت اخيام الستر
.
من بعد ما جفه جهزهه الخيمْ
بيده زتهن للخيم كل الحرمْ
يفيي من الشمس الهن بالعلم
الما انشاف اخيالهن طول العمر
.
حالة ما صارت ودارت بالعرب
ناگة تمشي وكلها محنية الرگب
ابو فاضل كاد ناكة وخيمة طب
ناكة المكفولة اخته ام الخدر
.
تالي رد وانحنى كدام الحسين
وقبله من جبهته وگال الحنين
اهواي مشكورة ييمه ام البنين
على هذا الربى الواجب ينشكر
…
هذا موقف صار يوم الي اوصلو
لكربله وجنب الشريعة خيمو
لجن تالي الليل لمن خيموا
حسين خبرهم العاشر والغدر
.
حسين خبرهم بكتله وبالعطش
ساعة اليغلى اعلى جثته النعش
وبالخيام ونارها يوم احدعش
وبالضياع اليحل وبذاك الذعر

قصائد الليلة الثالثة

ودع ابنيته ورگب ميمونه
وروحه رادت تطلع امن اعيونه
.
حسين طول الليل مشغول الفكر
ما مغمض لحد ما حل الفجر
يفكر ابنته العليلة ومنكسر
شلون باجر من تودع اضعونه
.
صلى واخبر زينب تحضر الضعن
وكالها وي العليلة اتوداعن
واعتنن كلهن بنات ام الحسن
ياخذن من خاطر المحزونه
.
حسين صد هي ورقية تگابلن
وجسد واحد صارن امن اتشابگن
ازغار ويكسرن الخاطر لو بجن
حسين من صدهن تغير لونه
.
فجاة مسحت بالعباية عينها
لان لمحت يجري دمع حسينها
اتعمدت كدامه تخفي اونينها
وراحت وشبكته تشم امتونه
.
شمته وباسته وگامت تبتسم
تگله يا احلى ابوّْ بكل الزلم
انه ترباتك يبويه لا تهم
لا تهم وانه الك ممنونه
.
بيدها زتت ابوها للمهر
رگب بس حسين گلبه منكسر
يدري گلب ابنيته متحول جمر
وحتى لا ينجرح صارت عونه
.
نوك الضعون ابتدت ممشاها
ودار وجهه حسين لن شافاها
على الباب وتومي اله ابيمناها
حس هضمها من تضل من دونه
.
حسين حن گلبه ونزل من مهرته
رجع مسرع وهوْ تجري دمعته
كعد عالكاع وحضنها ابنيته
والدمع مدري شصبغها جفونه

كتبت هذين القصيدتين على هذهِ الرواية


أخذ الإعرابي كتاب فاطمة وأقبل إلى العراق يسأل عن الحسين حتى وصل الى أرض كربلاء بعد الظهر اليوم العاشر من المحرم وإذا به يجد الحسين عليه السلام وحيدا فريدا لا ناصر له ولا معين بعد قتل الأصحاب وبني هاشم، وهو يجيل النظر يمنة ويسرة بين آلوف الأعداء، فسلمه الكتاب. وقيل: إنه جاهد دون الحسين حتى استشهد بين يديه.

فتح الإمام الحسين عليه السلام الكتاب وإذا به من ابنته فاطمة العليلة، فبكى بكاءً شديداً .ووقف أمام خيمة النساء ونادى يا زينب ويا أم كلثوم ويا رقية ويا سكينة ويا فلانه ويا فلانه هلمن فلقد جاء الكتاب وعظم المصاب فخرجت الحوراء زينب قالت أخي أخي حسين أما المصاب فنحن فيه ولكن أخبرني عن الكتاب فقال اخيه هذا كتاب من ابنتي فاطمة وهي تسلم على عمها العباس ولا تعلم بأنه على شاطي العلقمي مقطوع اليدين وتسلم على اخيها علي الاكبر ولا تعلم بأنه مقطع بالسيوف اربا اربا ..

?وكأني به فتح الكتاب وجعل يقرأه عليهن: ثم ان الحسين عليه السلام اخذ الكتاب وجاء به الى أرض المعركة وتوسط القتلى ونادى برفيع صوته هذه فاطمة العليلة تبلغكم السلام

المواقف . كلهن حزينه
وتدور . عالتبجي عينه
بمحنه . تريد البواجي
تغرب . الروحه حنينة
.
حسين من ضل وحده بين الخيام
نوى يودع ضعنه ويروح الامام
لن تشوف اعيونه اكو مجبل عليه
گاله المجبل الك عندي كلام
.
گلاله جيتي امن المدينة
من العليله والحزينة
مكتوب الك من عدها جايب
كاتبته بيديها الحنينة
.
تلگه الكتاب بيمنته
وحطه اعلى گلبه وجبهته
يشمه ويَقبله منهضم
كوة يمنته فتحته
……………………….
بمسافة . عن الثكاله
بيمنته . فك الرساله
تغير .حاله تغير
دمعته . شدهتله باله
.
حسين طاحت دمعته ودلاله ذاب
شاف اثر لدموع بنته اعلى الكتاب
على كل كلمة لگة دمعه عذاب
ابعزيزة گلبه شمسوي الغياب
.
طاح الحسين اوراح حيله
من شاف دمعات العليله
يقره تامُلها برجعته
وشلون محزونه برحيله
.
ما تدري واليها غده
بين الخيام الوحده
واكف غريب ومنكسر
وتفتر عليه خيل العده
……………………………………
قراها . وگلبه تألم
توجه . صوب المخيم
يزينب . شوفي المصيبه
العليلة . برجعتنه تحلم
.
صاح كل مخدره من الخيام
وگعد يقرا اگبالهن كل الكلام
كاتبه سلملي بويه اعلى الكفيل
ما درت بيه منذبح گبل السلام
.
يا بويه وصلي سلامي
لّعّمي عباس المحامي
انتظره لحضه .لحضه يرجع
ويكلي فوك امتوني نامي
.
ما تدري عباس الگمر
متمدد بصف النهر
ما تدري ابوها بفركته
كدام عدوانه انكسر
………………….
يزينب . يختي العقيلة
اخبري . بنتي العليلة
عليها . مخنوكة روحي
عليها . الحسرة ثكيلة
.
خبري بنتي الفركة ما خلتلي حيل
عنها گلبي انجبر يختار الرحيل
فكرت هي عليلة ومن اطيح
شلون راح تفر اذا تدناها خيل
.
خبريها لمن ودعتها
وصاحتني بويه وشابگتها
ودمعتها طاحت فوك اديه
وياها روحي طَلعتها
.
عالباب من اومت الي
صبرت دمعي بيا علي
درت الوجه عنها ورحت
وبخدي دمعاتي تهلي

من بقى وحده الحسين
لا نصير ولا معين
وجتل اهل بيته اخذ من عنده حيله
.
شاف اكو اعرابي اعتناه
نوخ الناگة واجاه
سلمه مكتوب من بنته العليلة
.
اخذ بيده الكتاب وقبله ونزلت دمعته
على المكتوب شافا جاف ماي عيون بنته
ايتلمس كلمة كلمة بجفة وتخنكة عبرته
يدري الهيج تكتب يعني من الفركة ميته
.
يا ابو اليكدر يخفي الدموع
من يدري گلبه ابنيته موجوع
مو دمع عينه ابو السجاد
جا طلع كلبه من الضلوع
…………….
مسرع اتعنه الامام
وكف كدام الخيام
وبعلات الصوت صاح اعلى الفواطم
.
امن الخيم المدللات
صوبه ركضن خايفات
دايرة صارن على سيد الهواشم
.
يخفي دموعه كل مرة رغم مهدوم حيله
بس هالمرة هل دمعة كبال اخته العقيلة
كَللها العليلة تكول مشتاكة لعمامي
وعلى العباس يا زينب تسئلني العليلة
.
ما درت عمها ابلايه جفين
يم الشريعة مغمض العين
ما تدري المدللها عباس
دارت الحومه اعليه صوبين

………………………..

اتگربي يا بت الفحول
خويه اسمعيها شتكول
تكول يا بويه دليلي حن لخوتي
.
ادري حن عبدالله الي
ادري حن يغفى اعلى ادي
وادري يا بويه يحن هسه اعلى صوتي
.
واخوي الاكبر انه اخته واعرفه شكد يحبني
ما ينساني ويرد ليه ياخذني وعدني
بعدني متانيه لجيته اخوي الدللاني
الگبل ما يغمض جفونه كبل لا اغمضه جفني
.
ما تدري الاكبر ذاك مذبوح
وفوك الترايب ضال مطروح
ما تدري عبدالله بضماه مات
ما بقت من العطش بي روح
……………
من بعد ما گلبه ذاب
حسين اخذ بيده الكتاب
راح وتوسط اخوته العل ترايب
.
بعبرة صاح الهاشمي
صاح اسم كل فاطمي
يا بني الزهره ادركوا الگلبه ذايب
.
يلوح بالكتاب ويندب اسماء الهواشم
يا عباس يا عبدالله يالاكبر يجاسم
عليكم فاطمة تسلم مشتاكة العليلة
هجركم ذبلاها وتعباها يالضياغم
.
نمتوا وبقيت لوحدي مهضوم
ومحاوطتني بخيلها الگوم
يالما مثلكم زلم وحيود
النوم ما لاگلكم النوم

سيدتي مولاتي اهٍ لمصابك العظيم
اقسم على الله بهذا العذاب ان يعجل الله فرج مولانا بقية الله صلوات الله عليه




دلالي من الفركة موجوع
افراكهم ما كفته ادموع
ما احسه ينبض جوه الضلوع
جنه الكلب راح اويه الضعون
.
فاركتني العافيه من فاركوني
اتغيرت واتغير امن الفركة لوني
دموع عيني غيرت حتى الملامح
رحمة لو ردو هلي وتالي اعرفوني
.

…………………………….
اليوم ما جنه يجي النوم
مهضوم كلبي وحيل مهضوم
ليش اهلي ما ذكروني لليوم ؟
ما ذكرو احبيبة گلبهم
.
شكد حنينة گلوبهم ما ضن نسوني
اهلي البماي گلبهم دللوني
لجن ست اشهر اهواي وانه اناطر
لا رساله الاجت منهم لا اجوني
.

……………………….
البجوني لمن ودعوني
ان جان باجر ما يجوني
وعبدالله ما اشوفه بعيوني
ازعل وهمه بزعلي يدرون
.
ازعل وماي اهلي ما اضوگه واشربه
والدوه ما ادنى يمه ولا اگلَبه
لو اموت احسلي من عيشتي هايه
شنهي ضلتي وحتى هذا الهوه غربة
.

………………………………….
سويت كلشي وما ارتاحيت
تكتل كتل يا وحشة البيت
كون بكبر يا بوية غمضيت
ولا هاي كطعتكم عليه
.
بوية لو درب الضعن تندله العيون
جا انه من ليلة امس امشي اويه الضعون
حتى لو جدمي تعب ازحف واجيكم
كلشي يا بويه لاجل شوفتكم يهون
.

……………………………..
ريحة غريبة مرت الروح
رسمتك بويه بعيني مذبوح
اوعمتي زينب كاعدة تنوح
بس لا صدك عيني التشوفه
.
رسمتك عطشان بويه بهيمة نايم
وعالترب متوسدة بدور الهواشم
وخيم محتركة وعدوك يمها واكف
وعمتي يتامر عليها الجان خادم

روحي يهلي . مشتاكة الكم
يا فركاكم اقسى شدة
اتمنى اكعد . يمكم ساعه
وياكم يا محلة الكعده
.
يهل الغيره /يالكمر . يالشهم . يا علي. يا خويه الاكبر
وانه زغيره /الوحدي . بغرفتي . بدمعتي . واتخيلو المنظر
بكل عصريه / انكسر . وابقى اشم. بالهدم . واتحن عيوني
ووجي اديره / لكربله . واختنك . والنفس .كوه يضل ينجر
➖➖➖➖➖➖➖➖➖➖➖
اول دمعة . طاحت مني
للرباني بين احضانه
بويه افراكك . كاسر كلبي
لحنيتك روحي عطشانه
.
يمدللني . من احن . يرسملي . خيم . وانت تباريها
واليكسرني . من رقيه . الك . تبتسم . وانت تحاجيها
لو ماخذني . جا بقينه . سوه . بالخيم . انه ورقيه
اختي تحبني .ومن مشت. ما رضت . تفترك . عن ايدي ايديها
……………………………
يا رقيه. . يالحنينه
تدرين انه شكد مشتاكه
حاجي ابونه . يرد ياخذني
طلعت روحي من افراكه
.
يا رقيه . يختي ما . غمضت . الجفن . الا واني ابجي
تموت اديه .لو شفت . يالحنينه . ابو .وي بته يحجي
مو عليله . ومشى مني . المرض . هسه اون . من فركه طوله
يحن عليه . لو طحت . غير ابونه . منو . ولابنيته يتجي
……………………….
يا ابو فاضل . عمي وينك
مو واعدني ترد تاخذني
يمربيني . بماي اعيونك
افراك اعيونك واجعني
.
حلمي عيوني . بابي يندك . وافتحه . واشوفن ذيج الضحكة
حلم عيوني . يالوفي . ترد الي . وتنتهي . . ايام الفركة
حلم عيوني . عمتي . زينب . ترد . والعلم . فوكاها يرفرف
حلم عيوني . من ابوي . الكلب . من يرد . يحضاله بشبكه
….

رئيسية / ثكيل

غربة عايشلك يبو گلب الغريب
ما يطيب بگلبي جرحك ما يطيب
گلبي من الله نصيبه
جرحك الما صحله طيبه
يا غريب

……………..
الف واتلثميت عام
والجرح نفس الجرح
كل رجب الكاك مضعن
بكل محرم عالرمح
بكلهن الكه اعيون طفله
ساهره لحد الصبح
اتاني مره اتشوف وجهك
تالي تقبل تنذبح
.
جان كل احلامها تشوفك تعود
انت ابوها الماكو مثله بهل الوجود
والابو يكتل مغيبه

………………………………..
ودي مره اكعد واشوفك
ابيتك مغمض الجفن
ليش كل ما اكعد الكه
عيونك لبيتك تحن
غير امام الدنيه انت
وبيك ناسك تطمئن
مضطرب ليش وعُيونك
حمرة لونها الحزن
.
قلق هاجرت المدينة وبنكسار
تمشي خطوة وتلتفت صوب الديار
اهناك عايفلك غريبة

…………………………………
ابتعد ضعنك عالمدينة
وليل اجاك وخيمت
نومت كل الضعينه
وانت كاعد ما نمت
نومت بيدك رقية
واكو طفلة اذكرت
گبل ما يغمض جفنها
الا تحضنها جنت
.
حسبت من تكعد بهذا الظلام
ياهو اليلوليلها خاطر تنام
يا كبر هاي المصيبة

……………………………………………

ردت اعيشك مره تفرح
وابسمتك انشغل
وابتسم من اذكر اسمك
مو دمع عيني يهل
واندرت شفتك تباوع
بجف رقية انشد حبل
طفلة من حضن المحنة
راحت لحضن الهزل
.
والسعادة انذبحت وراحة البال
من ذبح حبل الاسر ذاك الدلال
وراحت ابنيتك سليبه

……………………………….
هذا انت وهذا جرحك
الم مشدود بالم
ابتدا من المدينة
وخضر بحرك الخيم
آوله فركة عليلة
وتالي بيه طيحة علم
وآخرى ضيعة بناتك
ابين ناس ابلا شيم
.
والسنين انرهنن بهذا الجرح
امن المدنية لصعدتك فوك الرمح
والدوه القائم يجيبه


تمت بعين مولانا الكاظم عليه السلام