يوم العاشر  وصلن بنات الزهراء لمصرع الحسين عليه السلام

كاني بمولاتنا العقيلة عليها السلام لما راته
نادت بصوت حزين  وقلبٍ جريح  😭😭

بلسان الحال

🏴🏴


هاذه حسين
امغسّلاته دمومه

هاذه حسين
ابدّلات ارسومه


🏴🏴


مااعرفنه اوصافه      هاذه حسين
امغسّلاته دمومه

طاحنين اچتافه     هاذه حسين

يحتار كلمن شافه    هاذه حسين

مسوينه ترس الحومه

هاذه حسين
امغسلاته دمومه

🏴🏴

امكسرات  اعظامه   هاذه حسين
امغسّلاته دمومه

وصلن ال حد اخيامه     هاذه حسين


يلمّون بيهه ايتامه      هاذه حسين


ياجيت الميشومه

هاذه حسين
امغسّلاته دمومه

🏴🏴

مفروش جسم الوالي    هاذه حسين
امغسّلاته دمومه

مرفوع راسي گبالي     هاذه حسين

ويگلّي لمي عيالي     هاذه حسين

ياحيل ظل للگومه

هاذه حسين
امغسلاته دمومه

🏴🏴

الله واكبر ياهلي   هاذه حسين
امغسلاته دمومه

ياحمزه وينك ياعلي    هاذه حسين

مذبوح اخيي بالخلي    هاذه حسين

ومسلّبات هدومه

هاذه حسين
امغسلاته دمومه

بعمامته يومولي   هاذه حسين
امغسّلاته دمومه

تردينهه يگولولي   هاذه حسين

يضحكون  ويئشرولي   هاذه حسين


وآنه الطم ومهظومه

هاذه حسين
امغسلاته دمومه

🏴🏴

للجثه جبت ابناته   هاذه حسين
امغسلاته دمومه

يمسحن دمه اصواباته    هاذه حسين


الليل  وين نباته    هاذه حسين

اعلينه الزلم ملمومه

هاذه حسين
امغسّلاته دمومه

🏴🏴

ارقيه تگل لسكينه    هاذه حسين
امغسلاته دمومه

اعله الراس ادوور وينه ؟   هاذه حسين

يباوعلي خله بعينه     هاذه حسين

اتصبّرها اجت چلثومه

هاذه حسين
امغسلاته دمومه


🏴🏴


عظم الله لنا ولكم الاجر


ام محمد الحجاج 


٢٥ //ذو القعدة
الموافق

٣ //٦ // ٢٠٢٤

https://www.tg-me.com/الشاعرة أم محمد الحِجِّاج/com.ommohamadalaebaadey

يوم العاشر
وحرق الخيام
كاني بمولاتي العقيلة عليها السلام لما احرقوا الخيام علی الاطفال والنساء
فررنََ من خيمة الی خيمة والنار باطراف العبي  .  نادی الامام السجاد عليه السلام عمته زينب عمه فرّن الی الصحراء . فر الجميع الا مولاتنا زينب عليها السلام لقيت واقفة اما الخيمة والنار اخذت اطراف ثيابها  . لان العليل وسط الخيمة تريد اخراجه قبل ان تصله النيران

قالت بلسان حال الشاعر

🏴🏴



ماظلت بهاي الوادم مروّه
اعاين للحرم بالنار تجّوه

ناس المالهم شيمه
عليهن حرگو الخيمه
اعاين للحرم بالنار تچّوه

🏴🏴


عليل بخيمته مانگدر نطلعه
وصلت ليه النار نشوفها تلسعه
ذبايح بالخلي كلهم هله وربعه
ماظل اعربي بي شيمه ونفزعه


ماأگدر اطلعنّه
لا نغّار افزعنّه
ينهض ويرد يعثر بالجمر جوّه

🏴🏴

مناه نار مناه خيلهم جتنه
وين نروح كلهه مذبّحه اخوتنه
ماكو خيام حرگو حته خيمتنه
بنات حسين صاحن وين عمّتنه

خذتنه النار ياعمه
علينه الخيل ملتمه
عله متون البنات السوط  يتلوّه

🏴🏴

فرّن للبراري يلحرم فرّن
ديرن بالچن خافنچن تعثرن
ايد بايد لزمن كلچن وطرّن
درب الخيل صوب المشرعه عبرن

ندهن كافل العيله
شلون بحيرة الليله
گلله الشمر من عگبك استقوه

🏴🏴

روحن وآنه ادور ايتام خلّنّي
ياهو الضاع ياهو انسحگ دلّنّي
روحن للشريعه وآنه مهلنّي
تالي الليل يم الجثث تلگنّي

يم حسين نتلاگه
عمه ونگعد براگه
اريد الليله اودع ريحة الخوّه

🏴🏴

اگلّه الخوه حدها الليله وياكم
امشي ميسره وادعي الله يرعاكم
خويه شبيدنه يلمادفنّاكم
اجينه وياكم ونرجع بلياكم

اختكم حيل مهظومه
مابسكم من النومه
لو تدرون عصر العاشر اسوّه

🏴🏴

اريد انصب عزاكم مايخلونه
ماالطم السوط الهدّل امتوني
جبتوني اكون انتم تردوني
شمّاتي عگب عباس يحدوني

الدنيه شسوت بحالي
چتال اهلي يبرالي
باچر لليسر يبره الظعن هوّه

🏴🏴


تمت بحمد الله تعالی

٢٥ // ذي القعدة

الموافق

٣// ٦// ٢٠٢٤


✍ ام محمد الحجاج 

https://www.tg-me.com/الشاعرة أم محمد الحِجِّاج/com.ommohamadalaebaadey

حين وقع الامام الحسين عليه السلام من ظهر الجواد وضعُف عن القتال واعياه نزف الدم صار الجبناء يتجاسرون  . يطعنونه بالرماح ويضربونه بالسيوف حتی بات هدفهم  ..

ابو ذيه ليوم العاشر

🏴🏴

غده لسيوف اميّه  منحر  حسين ( ينحرونه )
مات امن العطش لو   من حر  حسين
ثنّه الشمر يگطع  منحر  حسين
وب باب الخيّم تصرخ رقية
ۧ
ام محمد الحجاج 


https://www.tg-me.com/الشاعرة أم محمد الحِجِّاج/com.ommohamadalaebaadey

رباطات ليوم العاشر
بعد مقتل الامام الحسين عليه السلام


اختكم الظهر // طرّت الخياله

يم عون لحگيهه// رقيه من الشمر

جرّو تراچيهه // ودمهه يسيل ظل

حرگو الخيمه // وينك يخو زينب

لزمن الهيمه // بنات حسين فرّن

من يطفيها // والنار بعبينه



ام محمد الحجاج

ليلة الوحشة
وحضور مولاتنا فاطمة الزهراء عليها السلام لكربلاء
عند الجسد المقدس لابي عبدالله عليه السلام

كاني بها بلسان حال الشاعر

🏴🏴🏴

حسين يمه حسين يمه حسين يمه

حسين يمه حسين يمه حسين يمه

🏴🏴

وينك انت هاذه بس دم وتراب

وين طولك وين يايمه الثياب

وين لحمك يبني اريدلّي جواب

واصل امن الشاطي وال حد الخيام

بيش المّك  نعمه واتبدّت حرام

وين ادوّر يمه والدنيه ظلام

حسبن يمه حسين يمه حسين يمه

حسين يمه حسين يمه حسين يمه

🏴🏴

وين راسك خل اشم خد التريب

وين شيبك گالو بدمك خضيب

ليش عاري مسلبينك يالغريب

جابلني وعاونني يلبنات

دورن وياي الضلوع امطشّرات

عود يم ابني ردت هلليله ابات

حسين يمه حسين يمه حسين يمه

حسين يمه حسين يمه حسين يمه

🏴🏴

سهم المثلث شيجرّه امن الگلب

ليش يايمه اعلوجهك منگلب

طامّه جروحك عمت عين الترب

ماكله بخاصرتك هواي الرماح

شويه منك ظال وين الباقي راح

والحوافر ما مخليه امن الصفاح

حسين يمه حسين يمه حسين يمه

حسين يمه حسين يمه حسين يمه

🏴🏴

ذاااك راسك شايلينه  اعله الرمح

من عمت عيني عليه شابع ذبح

هم حلو بعده مثل وجه الصبح

غارز بمنحرك يايمه السنان

عله عيونك مايمر غير الامان

آنه يمك بايته بهذا المچان

حسين يمه حسين يمه حسين يمه

حسين يمه حسين يمه حسين يمه

🏴🏴

كون ينطونك الي لوكت الفجر

باچر تروح اويه اخيتك لليسر

ارد اودعك والم بهدومي العطر

غير ينطونك الي امسح دماك

جايبتلك ماي ابلل لك شفاك

سفر باچر بالشمس يبني وراك

حسين يمه حسين يمه حسين يمه

حسين يمه حسين يمه حسين يمه

🏴🏴

يبني اشوفنهم منوخين الهزل

والسلاسل ولّموهن والحبل

يم بناتي الحرس كل ساعه شكل

ياخواتك وينهن وين الجمال

يابناتك وينهن وين الحبال

يادلال عيالك وراح الدلال

حسين يمه حسين يمه حسين يمه

حسين يمه حسين يمه حسين يمه


🏴🏴

تمت بحمد الله تعالی

٢٣ // ذو القعدة

الموافق

١ // ٦ // ٢٠٢٤

ام محمد الحجاج


https://www.tg-me.com/الشاعرة أم محمد الحِجِّاج/com.ommohamadalaebaadey

ليلة الوحشة  مولاتي زينب عليها السلام  توصي النساء  .....


علويات لاتبچن  لايسمعچن العسكر 

يبنيات لاتحچن احنه الليله وسط البر

ادري تريدن تروحن

يم ولياچن تنوحن 

خوفي تغير لينه الگوم  .. وآنه الوحدي مااگدر

.....
.....

احچن بالومي الليله .. حسچن لايسمعونه

ظمّن حته ونتچن ..  خاطر مايعرفونه

چلمات الشماته  تصيب .. تكتل من يصوبونه

ادري الفاگدات عزاز ..  يردن للبچي عونه

تالي اليل نگصدهم

ونظل للصبح عدهم

انه اكثرچن مضيعه وگلبي امن المصاب انطر

.....
.....

لا تبچن يعلويات  .. سكته الليله خلّنهه

لاتسمعچن الشمات .. ونّه لا تعلّنهه

من نروح  للوليان  .. سكته الليله تگضنهه

ذيچ الروس فوگ رماح .. تنظر لينه شوفنهه

الروس عيونهم لينه

يبچون البواچينه

واسمع واحد امن الروس لو ونّيت يتحسر

.....
.....

ادريچن يالمضيعات .. تردن تبچن الليله

والفگدت عزيز تريد .. تگضي الليل تبچيله

طول الليل يمه تنوح .. هظم العدهه تحچيله

بس ادخيلچن بهداي  .. يفتر العدو بخيله

خافن يهجم علينه

ياهو الليله يحمينه

لا لا ينسمع حسچن  .. شوفن خيلهم تفتر
.....
.....

خل عيونهم تغفه  .. وآخذچن الولياچن

شدّن للمصيبة حزام  .. وآنه اتحزّم وياچن

لمّن حيلچن للنوح .. للشوغات گواچن 

حضرن للسياط متون  .. لوسوط الشمر جاچن 

ادري جروحچن تنزف

بس ذاك الشمر واگف

بهيده لومشيتن ليل  .. خافن بالجثث نعثر

.....
.....

من نار الخيم ادري  .. مچويات رجليچن

لاچن شوفن الحراس  .. تربي عيونهم ليچن

خاف نگوم هسه نروح  .. ياهو وياي يحميچن

من يفزع علينه الجيش  .. وين الليله اودّيچن

لمّه نصير لو جونه

گعدن من يضربونه

وحده تلوذ يم وحده  .. وحده بوحده نتستّر

.....
.....



أم محمد الحجاج/ العبادي






https://www.tg-me.com/الشاعرة أم محمد الحِجِّاج/com.ommohamadalaebaadey

كأني بمولاتي فاطمة الزهراء عليها السلام  حضرت ليلة الحادي عشر من المحرم  عند جسد ولدها الحسين عليه السلام  وسمعت انين الاطفال والنساء  جاءت واستقبلتها مولاتنا  زينب عليها السلام  حوار بين مولاتي الزهراء عليها السلام  ومولاتي زينب عليها السلام  ليلة الوحشة  .....



          وزن الدارمي




يم حسن لاخوان لاخيمه والخيل

تروح وترد وتخاف منهه المداليل

ياصوب أضم ابنات اخوتي

.....
.....


حيره بنات حسين وين امشي بيهن
لاوالي  لاخيمات ظلن عليهن
خاف الشمر بالسوط غفله ويجيهن
السانه عله النسوان مايستحي اطويل

ياصوب أضم ابنات اخوتي

.....
.....


ونچن يمهظومات لمن سمعته

چن سهم صاب احشاي والگلبي فتّه
يمه بنات حسين ونهن عرفته
شفته العدا محضرين نوگ المهازيل
ياصوب أضم ابنات اخوتي

.....
.....

جيتچ ينور العين ها يالغريبه
يايمه شتحملين هم يامصيبه 
كافل ضعونچ راح وامّين اجيبه
خوفي العدا يم عون وياچن تعيل
ياصوب أضم ابنات اخوتي

.....
.....


وين اليتامه تنام نعسانه وتلوع
توجعهم التربان مچويّه الضلوع
من زفّة المحروم ماظلت شموع
حتى اليتامه تنام نشعلهه بالليل

ياصوب أضم ابنات اخوتي

.....
.....


گومن امشننه ارّوح يم جثة حسين
خلينه نگضي الليل يازينب اونين
ظلمه وستر يم عون من الملاعين
خلينه يمه نلوذ بين المچاتيل
ياصوب أضم ابنات اخوتي 

.....
.....


تفتر علينه الگوم مانگدر انّوح
ماتبچي يمه شلون العدهه مذبوح
گومن يمهظومات للمعركه نروح
ادري بالمضيعات ماظل بعد حيل
ياصوب أضم ابنات اخوتي

.....
.....


وين الرباب او وين رمله  ورقيه
فرن بهذا الليل اليا نويّه
هم هنّه مسبيات وآنه سبيه
والفجر وي الگوم عن كربله نشيل
ياصوب أضم ابنات اخوتي

.....
.....

حرمه وسبيه وليل وبديرة اجناب
لارحم بيهه الگوم لا فزعة احباب
شلون اليتامه تنام يلچمهه لتراب
توجعهم الچويات ودماهم تسيل
ياصوب أضم ابنات اخوتي

.....
.....


أم محمد الحجاج/ العبادي




https://www.tg-me.com/الشاعرة أم محمد الحِجِّاج/com.ommohamadalaebaadey

لليلة الحادي عشر مولاتي زينب عليها السلام  البارحة  وين  الليله وين كأني بها قالت  .....



محد مر عليه جروح
مثل جروح البگلبي
موجوعه اشهكت شهگات
يعلم بيهه بس ربي

.....
.....

شهكت مختنگ بالموت
اشهگ مادرو بيّه

احس مامش هوى بهل كون
شح حتى الهوى اعليه

يهل الشيم ماتدرون
عدكم اخت مسبيه

اعله اختكم يامرار الصار
آه يا ضيمي ياتعبي
.....
.....


نذرت الشوف من تلفون
اطشه اويالدمع كله

خل يروح فدوه الشوف
خل يعمه النظر خله

بس كون الايام تعود
والبيرغ علي ظله

يرد عباس والچفين
واشوفن كافلي بگربي

.....
.....

شلّي چابعد بالعين
المااشوف الگمر بيهه

اعاين للشمر حداي
كون امن البچي اعميهه

يروحي من عگب عباس
صارت هيچ تاليهه

يعيني ابچي على  العباس
دمعچ من دمه صبي

.....
.....

خيمه البارحه ورايه
على راسي وگمر بسماي

والليله بعباتي شلون
الي
لو ستر للوياي 

غطه اسويهه مدري فراش
ياحيره الاشد من هاي

واريد اطلع وادور ايتام
وزلم وعيونهم تربي

.....
.....

تفرهد  كلشي بالخيمات
بس بهدومنه اطلعنه

وخذو باجي العبي والخير
بس البيهن اگبعنه

الليله چا فرشناهن
ليش الگاع توجعنه

شلون ينام عالتربان
ال بعز وخير متربي

.....
......

عمت عين الوكت دوار
دار بزينب شسوه

چانت فخر للنسوان
او  عد زينب شلون اخوه

ياهو الگال اخت عباس
الليله تبات بالشلوه

يادهري اشبعد خليت
بعد يانايبه تخبّي 


.....
.....


أم محمد الحجاج  / العبادي


https://www.tg-me.com/الشاعرة أم محمد الحِجِّاج/com.ommohamadalaebaadey

ابو ذيه ليلة الوحشة

يسراي



الضعن غبشه  يريده الشمر  ..   يسراي

وبنفاسي احس الموت  ..    يسراي

مربوط بسكينه حبل  ..   يسراي

وحبل يمنياي مربوط برقية

.....
.....

ام محمد الحجاج
العبادي


https://www.tg-me.com/الشاعرة أم محمد الحِجِّاج/com.ommohamadalaebaadey

مولاتي زينب عليها السلام  بعد مقتل اولاهه واخوتهه كلهم   من صار الليل طلعت المستورة راحت يم جثة وليدهه عون گعدت بصفه شلون حالهه  گلبهه مكسور  اديهه ورجليهه مچويات بجمر الخيام واهي تعبانه تركض مناه وترد مناه ادور عاليتامه.  عمت عيني  عليهه   ...  حاچت وليدهه وسولفت وياه..... وكأني بها قالت.....





ياعون يبني ... بسك امن النومه

گوم حشم...  خالك الجيدومه

.....
.....



گوم يابعد امك وريع الگلب

روح يبني لخالك او وصل العتب

دنيه ليل ومااندليت الدرب 

زحمه تالي الليل اطر الحومه

.....
.....


استحي من  خالك اوصل للنّهر 

انهض انته وروح يصبي النظر

گله خياتك يبو الشيمه بخطر 

يعاتبنك زينب وچلثومه 

.....
.....


روح گله بناتكم بين العده

يمه عون الصار لمك ماسده

الما اندلهن وين مامتوچده 

الضايعه ماادري يامظلومه

.....
.....


گوم لمك يبني وازاها الوزه

الليل والخيل الدرب مااميزه

صيح هالولاد خالك فززه 

خله يفزعلي  ويفزع گومه

.....
.....

اوگف اعله التل واصيحن  ياهلي

كون محد منهم اليفزع الي

عافو بنياتهم وسط الخلي

والشمر گوّه علينه اعزومه

.....
.....


يبني بس عباس كافي لو اجه

حته بالسووه الليله نورجه

گله امي تگول يالبيك الرجه

حبالنه لليسر هالملمومه 

.....
.....


ام محمد الحجاج