★أبوذيات ونواعي متعدد لعريس كربلاء القاسم★

مصايب والمحن عاشرت ..مُرهن
والنار بدليلي وحزن ..مِرهن
عماتك يقاسم اوف ..مَرهن
واعله جنازتك. ابن الدعيه
✍🏻#الفاطمیه_الرافضیه_وافتخر

على القاسم اون وصحت ..يمـاي
ابني هالوگع عالغـــــبره  ..يماي
على عمه تخضب دمه  ..یماي
غمض جفنه ولا گطرة ..اميّه
✍🏻#ام_عباس_الحسيني

يفت الروح مات الولد ..لو شب
تحرگ ناره وسط الگلب ..لو شب
شخليلة ملح لو صبر ..لو شب
بعد شيفيد شنداوي المنية....

يوليدي يبعد الروح ..وحشاي
بلياك الليالي تصير ..وحشاي
شخلي لگلبي بغيابك ..واحشي
بس النار تسعر بي سرية....
✍🏻#ام_سيد_علي_المطوري

أنوح الـزفَّة الشُّبان .. حنِّيت
ومن دم گصتك يوليدي ... حنِّيت
غمضت عينك وللظهر ..حـنِّيت (حانيت)
عگبك  يمه ماحنيت إديه....
✍🏻#زهراء_اللامي
✾━━━━━━✾━━━━━━✾

★نصاري -- عاشوري -- زريجي -- جنوبي وغيرها من الأطوار الشعبية★
یجسام الولد یاماي العیون
شلون امصیبتك يوليدي واتهون
جرح گلبي سعه وهملت هالجفون
اعوفك عالوطيه يبني اشلون
✍🏻#الفاطمیه_الرافضیه_وافتخر

يجاسم ياثمر گلبي وفرحته
شيصبرني وغيابك ماحملته
يمه أَنه الولد للگبر ردتة
دعاين حالتي عالبعد مااگدر
✍🏻#ام_سيد_علي_المطوري

يمه يالولد رحت من ادية
عفتني بحسرتي واصفگها ادية
شبابك ردته ليّه للمنية
تشيل جنازتي وبالجمع تفتر...

تشيعني وتهيل بترب لحدي
رحت مني يفلقة گمر عندي
شلون اگضي بدونك عمري وحدي
يسباح الگلب جمراك تسعر...
✍🏻#ولائـية_وافتـخر (دعاء العامري)
✾━━━━━━✾━━━━━━✾

★مجاريد -- عاشوري وغيرها★
يومك ييمه مرد اچلاي
ولاغمضت بالليل عيناي
ضاع التعب ياييمه وارباي

تمنيت يومي گبل يومك
ولااشوف متغيره ارسومك
ياريع گلبي الغالي سومك
✍#ام_مهدي_الفرطوسيه

ماشفنه معرس يجتلونه
وبكربله نايم شلونه
ويلي ومغمضات عيونه

راح وتبهذل عگبه حالي
واعليه سهرت آنه الليالي
ياهيبتي عزي ودلالي
✍️#علويه_ام_فاضل

سباح گلبي الولد يبني
بيك الدهر يمه نكبني
وغلبه يضي عيني غلبني
المن يوالي البيت مبني
ارباك ياجاسم تعبني
لتعوف حملي ولاتذبني

يامهجتي يانور عيناي
يا الذ من الهوی والماي
يمه الدهر ماانصف وياي
وخانت يريع الگلب دنياي
فرهدت تعبي وسهري وارباي
✍🏻#ام_محمد_الحجاج
✾━━━━━━✾━━━━━━✾

★طور ((مالي غيرك))★
آه يجاسم -- يا نظر عيني يغالي
آه يجاسم -- من رحت نوح الصفالي
آه يجاسم -- بالحزن اقضي الليالي

ما تهنيت -- ابعرس والدم خضابك
ما تهنيت -- والچفن صارن ثيابك
ما تهنيت -- آ ييمه ابعز شبابك

لا تخليني -- ابغرب امشي سبيّه
لا تخليني -- ودموعي دم جريّه
لا تخليني -- وحيده ابلا تچيّه
✍🏻#ام_سيد_يعقوب_الموسوي
✾━━━━━━✾━━━━━━✾

★الجفيري -- الحدي السريع -- ياام الولد راح الولد★
وينك يا يُمّه اتأخْرِت
والزفّه لجلك حَضرِّت
عني غِبت ليش ورِحت
وشمسك يا يمه غَرّبت

ثياب العرس عندي وعطر
شسوى بعد قطع النحر
يا ريته يومي من قبل
موتك يا روحي والنظر
🖊#خادمة_أبي_الفضل
✾━━━━━━✾━━━━━━✾
#تـمت_بـأقــلام ✍🏻✍🏻
⚶مجموعة شاعرات أهل البيت⚶
⏪تأسست المجموعة ٧-٢-٢٠١٨⏩
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11

#فائزي لـ علي الأكبر ع

عِد إبنه صاح من الألم والكون اظلم
ريت المنية لوالدَك يا علي وتسلم
"""""""""""""""""""""""""""""""""""""

بعدك على الدنيا العفا والحيل خلصان
يا أول احلام العمر واول الاحزان
يم طولك بطولي طحت ياشبه عدنان
ويايه إرجع للخيم فقدك مَيرحم

✍🏻#خادمة_أبي_الفضل
❀❀━━━━•●●☆●●•━━━━❀❀

بحضنه يشمه ودمعته عالخد تجاره
بگليبي ياريع الگلب فگدك حراره
وبغيبتك هذا الزمن شحمل مراره
وبحالي ساع اللي طحت بس الله أعلم

✍🏻#ولائـية_وافتـخر (دعاء العامري)
❀❀━━━━•●●☆●●•━━━━❀❀

طولي تهدم وانتهت أيام عمري.
بعدك يالاكبر تيهيت وفاض صبري.
ظاگ النفس وتزاحمت زفرات صدري.
دهري صبح من فرگتك ميشوم وادهم .

✍🏻#ام_فاطمة_الزهراء
❀❀━━━━•●●☆●●•━━━━❀❀

وبحالي بس الله الدرى بيوم العفتني
ثگلان حيلي بطيحتك من فارگتني
مابيه أشيلنه الهدم حتى اعله متني
شلتك لچن روحي اطلعت يم المخيم

✍🏻#آلــــّعــلّويِـــه آلّمٌوسويِــــۿ
❀❀━━━━•●●☆●●•━━━━❀❀

ياريتني قبلك متت يانور العيون
مذبوح اشيلك للخيم يوليدي شلون
خليتني محتار يبني وگلبي محزون
بجروحك امسح ياحبيبي ونحرك اشتم

✍🏻#ام_محمد_الحجاج
❀❀━━━━•●●☆●●•━━━━❀❀

تدرون الاكبر شمعتي وعمري وحياتي
ومن بعده بالدنيا شلي أشري مماتي
آه يالولد يا حلو طوله وكل صفاتي
مات الولد وتتهدهد الحيل وتحزم

✍🏻#ام_سيد_حسن
❀❀━━━━•●●☆●●•━━━━❀❀
#تـمت_بـأقــلام ✍🏻✍🏻
⚶مجموعة شاعرات أهل البيت⚶
⏪تأسست المجموعة ٧-٢-٢٠١٨⏩
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11

★ فزاعية لـ علي الأكبر ★

شبيه المصطفى هاليوم
موت احمر يراويهم
:::::::::::::::::::::::::::::::::::::::::

الاكبر بالحرب معروف
صال ومايهاب الخوف
من عدهم عماه الشوف
گال اليوم افنيهم

✍#علويه_ام_فاضل
✿✿◈◈✿✿◈◈✿✿◈◈✿✿

افنيهم وحيرهم
عله التربان اكومهم
وحق حسين اطشرهم
لجهنم اوديهم

✍🏻#خادمة_اهل_البيت_ام_ابراهيم_الحلفي
✿✿◈◈✿✿◈◈✿✿◈◈✿✿

الاكبر دخل للميدان
صال وحيّر العدوان
حملة داحي البيبان
بالطف عادهه عليهم

✍#ام_محمد_الحجاج
✿✿◈◈✿✿◈◈✿✿◈◈✿✿

برز بالطف گضى لرجال
ماخله يضل خيال
عليهم بهذلاه الحال
گطع لنحور وايديهم

✍🏻#ولائـية_وافتـخر (دعاء العامري)
✿✿◈◈✿✿◈◈✿✿◈◈✿✿

ناصر للحرم واحسين
عليهم دَوّر الصوبين
يشيل الرايه بالعينين
وابسيفه يصد ليهم

✍🏻#ام_سيد_يعقوب_الموسوي
✿✿◈◈✿✿◈◈✿✿◈◈✿✿

خله بالحرب صوره
ليله بيه منصوره
تاهت هالعده بنوره
لو طب والله يعميهم

✍🏻#زهراء_اللامي
✿✿◈◈✿✿◈◈✿✿◈◈✿✿

ثار  ابثورة العباس
ردمهم راس ويه الراس
فرت خایفه  الارجاس
الاکبر ناوي  يمحيهم

✍🏻#ام_عباس_الحسیني
✿✿◈◈✿✿◈◈✿✿◈◈✿✿

بعزمه يشبه الكفال
صال وجن علي من صال
خيال وأبن خيال
يعصف لو يمر بيهم

✍🏻#آلــــّعــلّويِـــه آلّمٌوسويِــــۿ
✿✿◈◈✿✿◈◈✿✿◈◈✿✿
#تـمت_بـأقــلام ✍🏻✍🏻
⚶مجموعة شاعرات أهل البيت⚶
⏪تأسست المجموعة ٧-٢-٢٠١٨⏩
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11

★ أبوذيات ونواعي متعددة لـ علي الأكبر ★

أبوذيات شاچیه لسان حال أمه ليلى

على الاكبر جــرح گلبــي ..مينشال
تــــــوذر من وگــع ابنـي  ..مينشال
یحگ عودي وقـوامي آه ..منینشال
ولا انهــض بعـــد حــد المنیه....

ولا انهض ودمـــه بالعین  ..ینصاب
ومأتــــم بالگلــب واحزان  ..ينصاب
مصابک چم سهم بالروح  ..ینصاب
عسن میته گبل هـــاي الرزیه....
✍🏻#ام_عباس_الحسیني

يحلو الطول يبني السيف ..ورباك
يالاكبر ضاع يمه التعب ..ورباك
رحت وآنه انظر لمگفاك ..ورباك
ودعيت الله ترد سالم عليه....

مشيت وگلبي ويّه النظر ..يرباك
الزمت گلبي عرفت السيف ..يرباك
ياسهر الليالي ذيچ ..يرباك
بساعه يروح كل تعبي من اديّه....
✍🏻#ام_محمد_الحجاج

يناس من الهضم راسي ..علي شاب
أتفتت من عطش گلبك ..علي شاب
شبيه الهادي وخصاله ..علي شاب
وسف شبه النبي اتذبحه المنيه....
✍🏻#آلــــّعــلّويِـــه آلّمٌوسويِــــۿ
✿✿◈◈✿✿◈◈✿✿◈◈✿✿

★التغريد الحزين ((الشيخ زمان الحسناوي)) -- طور عبد الحي قمبر ((ياجبريل نترجاك)) -- لفى عاشور ((الشيخ سعيد المعاتيق))★
جابلها الولد مدمي ويلي مغمض عيونه
رسومه كلها متغيرة تعاين حالته ولونه
تلطم عالصدر والراس صفت لمصابه محزونه
يحيلي اتهدم اويه ابني تصيح وتنتحب ويلاه

تنحب والنسا اتجمعن يواسنها على الأكبر
الله يعين گلب امه بيه النار بس تسعر
لايشفى جرحها اعليه ومتشوف الدرب تعثر
راح الشوف من عدها گضت كل العمر تنعاه
✍🏻#ولائـية_وافتـخر (دعاء العامري)
✿✿◈◈✿✿◈◈✿✿◈◈✿✿

★ طور الحدي الركباني.. طور الحدي البدوي.. طور الفائزي القطيفي.. طورالفائزي البحراني العراقي.. طور تراث البحراني القديم.. ★
يبني رحت من عيني يا عزي ودلالي
مقدر اشوفك عالترب نايم اگبالي
والراس منك اقطعوه يبني يغالي
عقبك أنه بالهم قضيت اسهر ليالي

بعدك على الدنيا العفا يانور هالعين
يالأكبر عاين حالتي وللوالد حسين
حسره أجرها انه صفيت اصفج بالايدين
ظني انگطع آه يالولد والگاك چا وين
✍🏻#ام_سيد_يعقوب_الموسوي
✿✿◈◈✿✿◈◈✿✿◈◈✿✿

★مجاريد -- عاشوري -- وغيرها من الأطوار الشعبية★
ضاع الربه وسهر الليالي
يلولد ماچانت ابالي
موذر اشوفنك گبالي
يانظر عين امك يغالي
للعازه ذاخرتك يوالي
ياعلي ظل البيت خالي
يمه الدهر خييب آمالي
✍#ام_محمد_الحجاج

يالولد  يالرباك گلبي
وسفه الدهر ضيعلي تعبي
بموتك بعد ماشفت دربي

راح الولد ياضي العيون
وفگدك عليه موش بالهون
منك ييمه اگطعت الاضنون
✍#ام_مهدي_الفرطوسيه

منك.ييمه اكطعت الضنوني
عني رحت ياماي العيون
عگلي صبح هالبيك مجنون

يالولد يبني رايح الحيل
حيلي كظه ومانام بالليل
اذكرك ييمه ودمعتي اتسيل
✍🏻#خادمة_اهل_البيت_ام_ابراهيم_الحلفي
✿✿◈◈✿✿◈◈✿✿◈◈✿✿

★نصاري -- زريجي -- عاشوري -- جنوبي وغيرها★
أعتب عالدهر شيفيد العتاب
حسافه الأكبر تطمه يالتراب
شباب وماتهنه من الهوه الهاب

شيصبر الوالده الفگدت ولدها
من راح وبعد مارد سندها
وتفطر عليه ويلي چبدها
✍️#علويه_ام_فاضل
✿✿◈◈✿✿◈◈✿✿◈◈✿✿

★نعي گرناوي★
ودعته الفرح من يوم الفراگ
أنكسر دلالي من يوم العفتني••
وتراني بعازتك ولعينك أشتاگ
مهدومة بمغيبك يالفارگتني••
عگب عينك أون وتلوب هالروح
يالبعدك ورد شو ضيعتني••
شماله الموت ياخذ مني الأحباب
يهد حيلي ويمد أيده ويعتني••
✍🏻#آلــــّعــلّويِـــه آلّمٌوسويِــــۿ
✿✿◈◈✿✿◈◈✿✿◈◈✿✿
#تـمت_بـأقــلام ✍🏻✍🏻
⚶مجموعة شاعرات أهل البيت⚶
⏪تأسست المجموعة ٧-٢-٢٠١٨⏩
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11

#لطمية لسان حال مولاتنا الرباب عليها السلام بعد مقتل عبدالله الرضيع عليه السلام


عبدالله يبني الغالي … فگدك شده لي بالي
يا سلوتي وآمالي … عذبت يُمه حالي
——————————————

عبدالله يانور العين .. حز منحرك سهم البين
بالنوح اظل يُمه سنين ..  يا ضنوة الغالي حسين

يا وسف شفتك مدمي .. وزيّدت يبني همي
هذا نصيبي وسهمي .. مذبوح تالي اگبالي

✍🏻#ام_سيد_يعقوب_الموسوي
⊰✾⊱••••••••⊰✾⊱••••••••⊰✾⊱

ودّيتك يروونك .. ماظنّتي يذبحونك
لي مييت يجيبونك .. والسهم غيّر لونك

السهم بعده بنحرك .. ماجرّه خوفي يعورك
ماكمل عام لعمرك .. يبني المهد ظل خالي

✍#ام_محمد_الحجاج
⊰✾⊱••••••••⊰✾⊱••••••••⊰✾⊱

عبدالله مهدك يبني .. خالي بگه يعذبني
هد حيلي وتعبني .. بيك الزمن دولبني

ومانمت يمه ليلي .. مهدوم يبني حيلي
نار وتوجر دليلي .. ودمعي دمه ضل سالي

✍🏻#ام_عباس_الحسیني
⊰✾⊱••••••••⊰✾⊱••••••••⊰✾⊱

عبدالله يالب احشاي .. يالمنحرم من الماي
شطلبوك يوليدي بهاي .. وافگدت يايمه الراي

آيالولد يزغيرون .. بجفاك تدمي العيون
انساك يوليدي شلون .. لو ميتة آنة اشوالي

✍🏻#ام_سيد_علي
⊰✾⊱••••••••⊰✾⊱••••••••⊰✾⊱

يُمة وفگدت البسمه .. ريت وعيوني تعمه
يا نَفس بيّه اشتمه .. دَلالي عفته بهمه

واعدانة گطعو نحرك .. من عمري كون لعمرك
يمي بقى بس عطرك .. والهم عَلَّي متوالي

✍🏻#ولائـية_وافتـخر (دعاء العامري)
⊰✾⊱••••••••⊰✾⊱••••••••⊰✾⊱

ماحسبت عني اتروح .. عبدالله يالب الروح
بعدك فلا هاد النوح .. بسهمك دليلي مجروح

ابيا ذنب ويطلبوك .. ومن دمه نحرك رووك
عمرك ازغير وذبحوك .. عالماي ترحل تالي

✍#ام_زهراء_الزيداويه_البصراويه
⊰✾⊱••••••••⊰✾⊱••••••••⊰✾⊱

يمه الولد يا عمري .. بعدك خلص كل صبري
عگبك ميطفي جمري .. وعالوجن دمعي يجري

يوليدي عاين لمك .. صوبني يمه سهمك
لو بيدي ابقى يمك .. عگبك شنو اليجرالي

✍🏻#ام_سيد_حسن
⊰✾⊱••••••••⊰✾⊱••••••••⊰✾⊱
#تـمت_بـأقــلام ✍🏻✍🏻
⚶مجموعة شاعرات أهل البيت⚶
⏪تأسست المجموعة ٧-٢-٢٠١٨⏩
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11

★ فزاعية لـ عبد الله الرضيع ★
#تقرأ بطور الفواتح وأطوار أخرى وكذلك بطور ثقيل ووسط

من الماي انحرم عبد الله مدلولي
وفوگ اشفاي ذبحوها دللولي
^^^^^^^^^^^^^^^^^^^^^^^^^^^^

فوگ شفاي ماتت سلوتي بليلي
بعد هز المهد ذاك الي هد حيلي
أيست ودفنت التعب يا ويلي
ظلت فاهيه دنياي من حولي

✍🏻#ام_فاطمة_الزهراء
☆━━━━•●●☆●●•━━━━☆

واناغيلك ييمه بدمعي السهران
أگولن يابعد روحي العگل حيران
تنام بحضني أريدك والگلب لهفان
گلت وليدي اريده ومايسمعولي

✍🏻#زهراء_اللامي
☆━━━━•●●☆●●•━━━━☆

ضل خالي المهد منك يضي عيني
لا تسكت ييمه فدوة حاچيني
باعــد هالـزمن مـابينـك وبيني
مذبوح الوريد ابدمه وصلولي

✍🏻#آلــــّعــلّويِـــه آلّمٌوسويِــــۿ
☆━━━━•●●☆●●•━━━━☆

انا ابلـیاک یـمه شلي بيامي
یعبدالله رسمتک صوره بحلامي
يلب احشاي يبني تنذبح ضامي
الــف نيـــــشان بالدلّال حطولي

✍🏻#ام_عباس_الحسيني
☆━━━━•●●☆●●•━━━━☆

ياسباح گلبي وضوة عيوني
بفراگك ييمه اعداك فجعوني
حاربني الزمان وخابت ضنوني
وصحت وين الحياده مايفزعولي

✍🏻#العلوية_الحسينية_ام_حسين
☆━━━━•●●☆●●•━━━━☆

الو لي اعله المهد وادري المهد خالي
لكن صورتك مافارگت بالي
تناغيلي مثل كل ليله حسبالي
مشتاگه ارد اشمّك يابعد طولي

✍#ام_محمد_الحجاج
☆━━━━•●●☆●●•━━━━☆

ذبحو فرحتي وي ذبحت وليدي
واحس بيّه انگطع شرياني ووريدي
فرغ حضني وتريده تلولي له إيدي
خذوه مني واشوفه بدمه جابولي

✍🏻#ولائـية_وافتـخر (دعاء العامري)
☆━━━━•●●☆●●•━━━━☆
#تـمت_بـأقــلام ✍🏻✍🏻
⚶مجموعة شاعرات أهل البيت⚶
⏪تأسست المجموعة ٧-٢-٢٠١٨⏩
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11

★ أبوذيات ونواعي متعددة لـ عبدالله الرضيع ★

★نصاري -- عاشوري -- زريجي -- جنوبي وغيرها★
يمه الولد يا يمه
زغيرون الولد مو مال عامود
يبني اعليك ضل الگلب ممرود
ردت وكتي يعودك بس الي اردود

اوي يمه اوي يمه الولد يمه

بچى وليدي الذبحته ودمعت العين
وصارت دمعته بعيون لحسين
وچنه يگله بويه افدي وريدين
وريد الغربتك يمكمل الدين
وريد اعله السبي وحرگ الدواوين
اوي بويه اوي بويه
✍️#م_سيد_حسن
☆━━━━•●●☆●●•━━━━☆

★أبوذيات★
يمه الولد يمه
حسبتك ذخر بالدنيه ..ومالي (المال )
يلمنوور حياة امك ..ومالي
يل اطلبتك من الباري ..ومالي
غيرك سلوی يل رحت من اديّه....

گلبي انفطر يوليدي ..وريدك
يمه بيا ذنب گطعوا ..وريدك
الي جابوك ماتبچي ..وريدك ( واری ايدك )
مخضوبه بدمه سهم المنيه....

ردته يشرب امّيّه ..وراه حي
وليدي بهجت ايامي ..وراحي
تالي اتخضبت راحه ..وراحي
من عنبر وريده الجره عليّه....
✍🏻#ام_محمد_الحجاج

سلوة دنيتي وغيره ..ولالي ((ما ألي))
بدونه انهاري اظلم ..ولالي ((الليالي))
أهزن بالمهد يمه ..ولالي ((ألولي))
عفتني وغمضت والحسرة بيّه....
✍🏻#ولائـية_وافتـخر (دعاء العامري)

تمنيت اسمعه لوصاح ..يمه ((يُمه))
العمر كله ردت عالدوم ..يمه ((يَمه قريبة))
وانـه لجله سهرت الليل ..يمه ((يامه))
وتالي انذبح ابني بديه...
✍🏻#ام_عباس_الحسيني

گضه وليدي العطش ماضاگ ..شربه
ومن دم ذبحتنه چن صار ..شربه
حاربني الدهر وشكثر ..شر به
خذاك من أيدي لأحضان المنيه...
✍🏻#آلــــّعــلّويِـــه آلّمٌوسويِــــۿ
☆━━━━•●●☆●●•━━━━☆

★مجاريد -- عاشوري وغيرها★
افراگ الولد ودرلي العيون
وبچلاي چن مشتعل چانون
حرموني منك يازغيرن

راح التعب يبني التعبته
والليل ذاك الي سهرته
وبروحتك گلبي شعلته
✍#ام_مهدي_الفرطوسيه

يمه الولد يا ناگود كلبي
وشسوه زمانی ها یربی
راح الولد وراح تعبی

بعد ما ینگطع یالولد ونی
وعلیک شنهی الیصبرنی
خالی صبح یالولدحظنی

صاب الرضیع وحزو وریده
فرفرت روحه وشمربیده
وشلون حال ابن الصمیده
✍️#_علویه_ام_فاضل

اليوم الحسين شلون حاله
وابنه انگطع نحره وشاله
وضيع معانيه ودلالــــه

شنهي الذنب يالعمرك ازغير
وسهم النحر يوليدي اجبير
واعله الميه اعيونك ادير
✍🏻#خادمة_اهل_البيت_ام_ابراهيم_الحلفي

دللول الولد يبني دللول
حسبالي غافي اطلعت مچتول
شلّك ييمه بنومة الچول
ياهيل فوگ الرمح مشتول
قرآن لو راسك المشيول
الگطع راسك ريته مشلول
چفه .. وعافيه بالدنيه مينول
اعاين لراسك مايل ميول
وبعده بدماه ياعبد مبلول
مذبوح يلماتممت حول
✍🏻#ام_محمد_الحجاج

ردت الولد لايام  كبري
لجن بسهمك نفذ صبري
محمل ذبحتك آ يعمري

ويلي المهد خالي وناغيك
عبدلله وينك يمه اناديك
رد لي بدللول آنه احاجيك
✍#خادمه_آل_القائم_(عج)_فاطمه_اللامي
☆━━━━•●●☆●●•━━━━☆

★طور مالي غيرك★
يمه يبني .. رحت ياعزي ودلالي
يمه يبني .. ليش عفت المهد خالي
يمه يبني .. بغيبتك هديت حالي

ودعتني .. وضلت عيوني جرية
ودعتني .. والجمر تستعر بية
ودعتني .. ورحت مني للمنية

يارضيعي .. مشبعت منك يالزغير
يارضيعي .. ماحسبت احساب ليصير
يارضيعي .. عينك افتحلي و الي دير
✍🏻#ولائـية_وافتـخر (دعاء العامري)
☆━━━━•●●☆●●•━━━━☆

★ طور الحدي الركباني.. طور الحدي البدوي.. طور الفائزي القطيفي.. طورالفائزي البحراني العراقي.. طور تراث البحراني القديم.. ★
مصيوب يبني يالولد مذبوح جابوك
من وريد لوريد العدا يايمه صابوك
وسهم المنية من الصغر يوليدي راووك
هذا نصيبي وانظر اعله المهد خالي

هزيت مهدك وانتحب وتهل دما العين
راح الولد مني بعد انطي الوجه وين
والروح ماتهدا بعد ياضنوة احسين
عميه عساني ولا شفت ذبحك يغالي
✍🏻#ام_سيد_يعقوب_الموسوي
☆━━━━•●●☆●●•━━━━☆

★التغريد الحزين ((الشيخ زمان الحسناوي)) -- طور عبد الحي قمبر ((ياجبريل نترجاك)) -- لفى عاشور ((الشيخ سعيد المعاتيق))★
أهزن بالمهد وأنعاك وأعاين للمهد خالي
أسمع صوت لمناغاك ووجهك چن تراوالي
عگبك لاحله ولاطاب يريته وياك ترحالي
دعيت الله يجيني الموت بعدك ياضوة هلالي
ولايبطل عليك النوح صبح مفطــور دَلالـــي..
✍🏻#آلــــّعــلّويِـــه آلّمٌوسويِــــۿ
☆━━━━•●●☆●●•━━━━☆
#تـمت_بـأقــلام ✍🏻✍🏻
⚶مجموعة شاعرات أهل البيت⚶
⏪تأسست المجموعة ٧-٢-٢٠١٨⏩
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11

#قصيدة لـ ليلة العاشر ليلة الوداع

صعبه خويه اشلون اودعك امنين اجيبنه الصبر
لو رحت ياخويه  عني اخلافك شيسوه العمر
صفت روحي هايمه••
وداعت امنه فاطمه••
.......................................

تدري يبن امي الموادع يوجع وكلش صعب
حسين ياروح الزچيه خويه ياريع الگلب
وداعتك من هسه احسَّن والله ضيعت الدرب

يالولي فراگك كلف••
جرحي ابد ماينوصف••
طولي ياليلة العاشر ريته لا طر الفجر

✍#ام_مهدي_الفرطوسيه
✿••✿<>••<>✿••✿<>••<>✿••✿

لا يطر فجرك يعاشر اصبر وهدي الوضع
خلي انودع ولينه وخل نسولف بالدمع
من بعد ليلتك هايه تدري ابد مانجتمع

باچر انودع الولي••
ومايضل واحد إلي••
وياهظم ظلمك يعاشر مثله ماضيم اليمر

✍#ام_زهراء_الزيداويه_البصراويه
✿••✿<>••<>✿••✿<>••<>✿••✿

هاي آخر ليله خويه صعب ياليل الوداع
والشمل يبن امي باچر للشتات وللضياع
الك فرض الذبح وآنه إلي فرض الافتجاع

انت باچر تنذبح••
وآنه اعاشر چم جرح••
ينحرگ صيوان خدري وتنسبي امهات الخدر

✍#ام_محمد_الحجاج
✿••✿<>••<>✿••✿<>••<>✿••✿

خويه آخر ليله يمك  وامشي ويه النايبات
فرگتك تصعب عليه  وينعدم طعم الحياة
اشلون اعوفك خويه مرمي وآنه تصحبني الطغات

روحي ماتحمل بُعد••
وحدي لاهلي شلون ارد••
خویه ماريدن أودعک  فرگتك مثل الجمر

✍🏻#ام_عباس_الحسیني
✿••✿<>••<>✿••✿<>••<>✿••✿

طولي يا ليلة العاشر أرد اودع اخوتي
اشلون افارقكم يخويه ونار تسري بمهجتي
أبقى وحدي ويه الاعدا لا مغيث لصرختي

لا انت لا ابوالفضل••
حايره بـ ايتام اضل••
من بعد عينك يخويه أمشي گوه لليسر

✍🏻#ام_سيد_يعقوب_الموسوي
✿••✿<>••<>✿••✿<>••<>✿••✿
#تـمت_بـأقــلام ✍🏻✍🏻
⚶مجموعة شاعرات أهل البيت⚶
⏪تأسست المجموعة ٧-٢-٢٠١٨⏩
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11

★ فزاعية لـ ليلة العاشر ليلة الوداع ★

وداع ودمعة من حسين
سالت والگلب ضامــــي
""""""""""""""""""""""""""""""""""""""

امــوادع ليلة العاشر
اشحاله من يجي باچر
العسكر عالسبط دايــر
ليلك هَيَّج آلامــــــي

✍🏻#خادمة_اهل_البيت ام ابراهيم الحلفي
✺✺—————✺✺—————✺✺

يعاشر ليلتك صعبه
دمع اموادع. وغربه
نفگد بيك. النحبه
ونعاين چم جسد دامي

✍#ام_زهراء_الزيداويه_البصراويه
✺✺—————✺✺—————✺✺

ومنين الصبر تالي
اذا يرحل ترى الغالي
وراسه اعلى الرمح عالي
وطفّي بحَرقة خيامي

🖊#خادمة_أبي_الفضل
✺✺—————✺✺—————✺✺

دليلــي ذاب أنا عليكم
یخوتي حايـــــره بيكم
بالعاشــــر أناعیکم
واحير آنه بلا محامي

✍🏻#ام_عباس_الحسيني
✺✺—————✺✺—————✺✺

یاخویه صعب الوداع
باچر حيرتي وضیاع
تطیح اموسد اعله الگاع
وتخلي هالنظر عامي

✍#علويه_ام_فاضل
✺✺—————✺✺—————✺✺

تبقى عالأرض عطشان
اويلي والعگل حيران
أضَيّع بالصبح لخوان
بعد ياعيني لتنامي

✍#خادمه_آل_القائم (عج) فاطمه اللامي
✺✺—————✺✺—————✺✺

فجره من يطر بينه
منّا يروح والينه
تحاوط هالعده اعلينه
وتبدي ظلمة ايامي

✍🏻#ولائـية_وافتـخر (دعاء العامري)
✺✺—————✺✺—————✺✺

يخويه موادعك صعبه
أحس من هسه بالغربه
وتظل عيوني الك تربه
بعدك ضاعت احلامي

✍#ام_مهدي_الفرطوسيه
✺✺—————✺✺—————✺✺

بـاچر نــار وي جمره
بفگدك خاطري تكسره
أركض والدرب عثره
تثگل خطوة أجدامي

✍🏻#آلــــّعــلّويِـــه آلّمٌوسويِــــۿ
✺✺—————✺✺—————✺✺
#تـمت_بـأقــلام ✍🏻✍🏻
⚶مجموعة شاعرات أهل البيت⚶
⏪تأسست المجموعة ٧-٢-٢٠١٨⏩
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11

★ أبوذيات ونواعي متعددة لـ ليلة العاشر ★

★التغريد الحزين ((الشيخ زمان الحسناوي)) -- طور عبد الحي قمبر ((ياجبريل نترجاك)) -- لفى عاشور ((الشيخ سعيد المعاتيق))★
كم ليلة باثر ليله..مَرّت عالقلب مُرّه
لكن ليلة العاشر..أشدّ واصعب على الحُره
طلعت بالخيم وتدور..آخر ليله يا زهره
تِجر اذيالها وتنحب..عسى باكر بلا فجره

يصبّرها أبو سكينه..وعن البلوى يحاكيها
باكر لو لفاكم جيش..يختي وصيّة نفذيها
عبايه فاطمة أمك..على رأسك دخلّيها
واذا شفتي الشمر جاني..سِكِينه يختي سكتيها

جِيبك لا تشقينه..أمر الله الذّبح مكتوب
وتشوفي عالنّهر عباس..مرمي وبالعمد مضروب
وبناتي امسلّبه الزينه..تتسلَّب قبل الغروب
وخِيامك تِشتعل نيران..ولا يبقى إلِك محبوب
🖊#خادمة_أبي_الفضل

لفت زينب لعند احسين وبيها تستعر جمره
تگله والگلب محزون بعد روحي شنو اليجره
صدق باچر يذبحونك واشوفك مرمي عل غبره
وعلى صدرك تجول خيول يبن امي واجر حسره

آه يخويه آه يخويه آه يخويه آه
آه يخويه آه يخويه آه يخويه آه

يبو اليمه صدق عباس يطيح وينكسر ظهرك
سهم بعينه لا چفين واتضمه الى صدرك
دمع العين عالخدين جود ورايته بكترك
وانه بالأسر أمشي بلا كافل حِرِت بامرك

آه يخويه آه يخويه آه يخويه آه
آه يخويه آه يخويه آه يخويه آه
✍🏻#ام_سيد_يعقوب_الموسوي

كاني بمولاتي العقيلة تكلم الليل😭
الليله زينب بياحال الله يعينهه الليله
شلون تصد لبو السجاد شلون المدمع تسيله
ساعدني عله الونّات تری گلبي خلص حيله
بس هلليله ويه حسين يوصّيني بمداليله
يليل منين اجيب الحيل باچر واكفل العيله
يليل وداعنه طوول اخوي ارد اگعد اشكيله
اگله من عگب عيناك غريبه واصبح اكفيله
يليل ارحم بگايه الروح خل ساعاتك اطويله
✍🏻#ام_محمد_الحجاج
✺✺————✺✺————✺✺

★طور الفراق★
ياهي ليله.. ليله العاشر نوايب
ياهي ليله.. بيها تتوادع حبايب
ياهي ليله.. باكر انطيح بترايب

خويه خويه.. مشبِعت منك يا غالي
خويه خويه.. ليش ترحل عني تالي
خويه خويه.. انظر الرووس بأعالي
🖊#خادمة_أبي_الفضل
✺✺————✺✺————✺✺

★أبوذيات★
باچر لو يطر فجرك ..يعاشر ((يوم العاشر))
للهم والحزن گلبي ..يعاشر ((المعاشرة))
لن هاي العده تنوي ..يعاشر ((الشر))
تتوسد دما اهلي عالوطيه....
✍🏻#ولائـية_وافتـخر (دعاء العامري)

عاشرني الحزن والنوح ..عِشره ( المعاشرة )
وحزني ماوصل يعگوب ..عِشره ( المعشار او العشر )
بس الليله باچر يوم ..عشره
اودع ابن امي لسيوف المنيّه....

اون والليل هم يون ..لونّي
لوي لحظات الموادع ..لونّي
يوم انكسر ضلع امي ..لونّي
ميته او لا موادع هلمسيّه....
✍🏻#ام_محمد_الحجاج

قدر ثابت صبح عاشور ..وجره
یخوتي عالجمر والنار ..وجره
عليكم دمعتي ادموم ..وجره
واخلکم عالترب وامشي سبيه....
✍🏻#ام_عباس_الحسیني

ولايصفى الدهر وياي ..ويصيح
ماطايب أبد دلالي ..ويصيح
چني بالشمر حز نحره ..ويصيح
ذبحت حسين خليتج سبيه
✍🏻#آلــــّعــلّويِـــه آلّمٌوسويِــــۿ

ليالي الحزن عالحرات ..شدن ((اشتدن))
أحاچي الدهر شنهو تريد ..شدن ((الدين))
توصيهن ربات الفحل ..شدن ((أي ربطن))
وصل حدها تحاربنة الدنيه...
✍🏻#ام_سيد_علي
✺✺————✺✺————✺✺

★مجاريد--عاشوري وغيرها★
ياليلي بس طول عليه
بوداع أبن امي الزچيه
باچر يضل عالسمهريه

ياليل طول ساع الوداع
مشبعت من گعدات السباع
لو يطر فجرك نومه عالگاع

باچر ضحايه كلهم اهلي
وبخدي بس دمعاتي تهلي
وگليبي ليهم يضل يغلي
✍#علويه_ام_فاضل
✺✺————✺✺————✺✺

★نعي گرناوي★
أنوحن هالمسا وأفرك بالأيدين
باچر لو طلع جايب رزيه••
لا أنته التضل يحسين وياي
ولاعباس يطفى الگمر ضيَّه••
أحيرن بالجمر وبنار الخيام
ولاواحد فزع منكم عليه••
أحشمكم صحت ياهلي الأطياب
من خيل العده ضاعت رقيه••
اعاين عالطفوف وبيها بس نار
ندبت أم الحسن تحضر إليه••
أبد مايحلى عيشي ولاحله وطاب
يريت ويه الأخو تلفي المنيه••
✍🏻#آلــــّعــلّويِـــه آلّمٌوسويِــــۿ
✺✺————✺✺————✺✺

★نصاري--زريجي--عاشوري--جنوبي وغيرها★
يليله أحلفچ بيه درُحمي
لو طر الفجر يزداد هظمي
أشوفن كافلي عالنهر مرمي
ومن بعده العده يزمخ عليه

أنا بيا گلب أودعهم بيا حال
أخوتي يافگدهم والله چتال
يوصيني أخيي بحرم وأطفال
ومو حسبه ألف حسبات بيه

يازهره ييمه بيه مُرِّي
ترى نار الحزن بالروح تسري
ودعني حسين ودمعي يجري
عزيز الروح مايشرب اميه
✍🏻#زهراء_اللامي
✺✺————✺✺————✺✺

★طور الحدي السريع★
لسان حال مولاني العقيلة عليها السلام
ليل الوداع اشگد صعب
وجّرها نيران الگلب
دمعي جمر عالخد يصب
باچر يعلنون الحرب
باچر حراير تنسلب
واهلي ضحايه اعلترب
واعدانه لخيمنه تطب
والعايله تعيش برعب
ولبن امي مااندل درب
✍🏻#ام_محمد_الحجاج
✺✺————✺✺————✺✺
#تـمت_بـأقــلام ✍🏻✍🏻
⚶مجموعة شاعرات أهل البيت⚶
⏪تأسست المجموعة ٧-٢-٢٠١٨⏩
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11

★نواعي لـ ليلة العاشر★

★التغريد الحزين -- لفى عاشور -- طور عبدالحي قمبر ((ياجبريل نترجاك))★
ولك ياليل اشو طول بالك لاتجي ابهـــمه
مستعجل عله ابن امي اشوفه يسبح ابدمــه
خيل وزلم كلها اعليه وزينب ارجع اتحشمه
صاحو بالخيم فرهود ياخويه يبو اليمـــــه
حسين ايطيح  بالميدان ويتوذر وذر جسمــه
من العطش گلبه ايذوب ويطشر. امن يلمـــه
وحافر خيل تسحگ بي يرك حيله ويگل عزمه
بناته الخوف ياخذهـن وعدانه بـلا رحمـه
✍🏻#خادمة_اهل_البيت_ام_ابراهيم_الحلفي

طول يا وكت الوداع عساه ولا يطر صبحه
باچر آه تتبع آه وگلبي ينزف بجرحه
يطيح حسين أضل أنعاه يغيب وماتضل فرحه
وافگد بيه گمر كفال مثل طير أنكسر جنحه
هدم حيلي فگد الأخوان والفاگد وگع صرحه
شريد أحچي ياطف الموت صعب الأحساس شيشرحه
✍🏻#آلــــّعــلّويِـــه آلّمٌوسويِــــۿ
✦════◐•⊰•❉•⊱•◑════✦

★طور سامحيني★
ليل الوداع -- ليل الوداع
بالخيم صار النحيب اويه الغوالي
ليل الوداع -- ليل الوداع
انظرلهم والدمع عالوجن هالي
ليل الوداع -- ليل الوداع
والصبح لو صار بي ياحال حالي
ليل الوداع -- ليل الوداع
شلون وحدي بغربتي أبقى الليالي
✍🏻#ولائـية_وافتـخر (دعاء العامري)
✦════◐•⊰•❉•⊱•◑════✦

★مجاريد -- عاشوري وغيرها★
الليله الولي يجهر بالونين
زينب تنوح وتجري العين
باچر تشاوط بين الاثنين

زينب تهل دمعات دمعات
تودع أخوها وتجر حسرات
عگبك تگله احنه سبيات

مضيعه الحنين ونور عيني
راح الولي وصرت بونيني
كفالي ماكو ولا حسيني

محله الولي ومحله صفاته
لو راح يا هو الهن بناته
بالذله عگبه مدللاته
✍🏻#العلوية_الحسينية_ام_حسين
✦════◐•⊰•❉•⊱•◑════✦

★طور الجفيري -- ياام الواد راح الولد -- الحدي السريع★
حسرة ودمع ليل الوداع
يرحون من عندي السباع
متلهفة لدمهم يگاع
يتوسدون اهلي الصبح

بوداعهم ماضل لي حيل
طول عَلَّي ليلي يليل
مايبقى حامي ولا دخيل
سيوف العده تنطر ذبح
✍🏻#ولائـية_وافتـخر (دعاء العامري)
✦════◐•⊰•❉•⊱•◑════✦
#تـمت_بـأقــلام ✍🏻✍🏻
⚶مجموعة شاعرات أهل البيت⚶
⏪تأسست المجموعة ٧-٢-٢٠١٨⏩‌‌
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11

#قصيدة لـ ليلة الوحشة


آه يامصعبها ليلة … عالحرم وية العقيلة
بلا ولي زينب بقت تاليها ••
وعالرمل نايم يضل واليها ••
««والسهم مارد دليلة»»
°°°°°°°°°°°°°°°°°°°°°°°°°°°°°

آه ياليلة الوحشة أشد ليلة اعله الحراير
ظلمة وبلايا محامي  والمصاب اعليها داير
بس علي السجاد يمها وبالمرض والغربة حاير

بعد كافلها العدو يحديها ••
للمدينة ياهو ليرد بيها ••
««يامصاب المامثيلة»»

✍🏻#ام_سيد_علي
❀●❀━━━━•❀•━━━━❀●❀

حايره الليله العقيله بلعليل وباليتامه
حارس اعلخيمه توگف الف ياحيف وندامه
من عگب كافل ظعنها والسباع اهل الشهامه

شلون ليله لزينب شيگضيها ••
الخيل كل ساعة تغير عليها ••
««ادركها ياحامي دخيله»»

✍#ام_محمد_الحجاج
❀●❀━━━━•❀•━━━━❀●❀

من عگب كافل خدرها بقت محتاره وحزينه
عالنهر نام الكفلها وگطعوا ايساره ويمينه
وماهده نوح العقيله والگلب يجهر ونينه

تنحب وجمر الحزن ماذيها ••
وبقت بس دمعاتها اتسليها ••
««الدمع دم اتسيله»»

✍#ام_زهراء_الزيداويه_البصراويه
❀●❀━━━━•❀•━━━━❀●❀

تبچي وتنوح اعله اخوها زينب وتندب ذخرها
شافت الخوان نومه شتحمل وشنهو صبرها
مصيبه الوليان توجع سلمت لالله أمرها

للغري تندب له وبعبرة تصيح ••
بويه عالرمضه بقى حسيني طريح ••
««نايم ومحد يشيله»»

✍#ام_مهدي_الفرطوسي
❀●❀━━━━•❀•━━━━❀●❀

ليلة الحادي يعالم صعبة من مرت عليها
تحرس اطفال وحرمهم تندب بحسرة وليها
بالغرب ضلت وحيدة نامو وما حد يجيها

من ايديها اتفرهدو كل الأهل ••
مايردون انگطع منها الأمل ••
««خلافهم ضلت نحيله»»

✍🏻#ولائـية_وافتـخر (دعاء العامري)
❀●❀━━━━•❀•━━━━❀●❀
#تـمت_بـأقــلام ✍🏻✍🏻
⚶مجموعة شاعرات أهل البيت⚶
⏪تأسست المجموعة ٧-٢-٢٠١٨⏩
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11

★ فزاعية لـ ليلة الوحشة ★

الليله وحشه اعلينه
چاوين شيال العلَم
------------------------------

زينب تحشم بالخلي
ماضلي واحد من هلي
الحگني بويه ياعلي
ماعندي والي للحرَم

✍️#ام_مهدي_الفرطوسيه
✿••✿<><>✿••✿<><>✿••✿

راح الأخو الچان السند
وتذبحو كثرة العدد
ماتطفى ناري للأبد
شبت مثل حرگ الخيَم

✍🏻#ولائـية_وافتـخر (دعاء العامري)
✿••✿<><>✿••✿<><>✿••✿

الليلة وحشه ومكدره
وبالخيم نار. امؤجره
وبحالنه محد. دره
ابعاد عنه اهل الشيم

✍#ام_زهراء_الزيداويه_البصراويه
✿••✿<><>✿••✿<><>✿••✿

ناديت والمدمع يصب
عبـــاس يــالب الگلب
مشونه من يمكم غصب
العسكر على خيامي هجم

✍🏻#آلــــّعــلّويِـــه آلّمٌوسويِــــۿ
✿••✿<><>✿••✿<><>✿••✿

وحشه عليّه ليلتي
بالغربه عشت بمحنتي
ياحاله صارت حالتي
لا واحد المنكم سلم

✍#خادمه_آل_القائم(عج)فاطمه اللامي
✿••✿<><>✿••✿<><>✿••✿

واعلینه خيم هالحزن
اشیگضي ليلي اويه الضعن
من البچــي عیـــوني عمـن
لا واحـد البیـنه رحـــم

✍🏻#ام_عباس_الحسیني
✿••✿<><>✿••✿<><>✿••✿

حرقوا خيمنه والعبي
وأمشي اسيره بالسبي
راح الكفلنه بالخبي
واصرخ من اسياط الألم

✍🏻#ام_سيد_يعقوب_الموسوي
✿••✿<><>✿••✿<><>✿••✿

طايح يخويه عالنهر
زينب وحيده بلاگمر
وشسوه ياخويه الدهر
وگليبي من رحتو انثلم

✍🏻#العلوية_الحسينية_ام_حسين
✿••✿<><>✿••✿<><>✿••✿

وينك يحماي الحمه
وينچ ييمه فاطمة
الليله وحشه ومظلمه
حتى العبي ريحتهه دم

✍🏻#ام_محمد_الحجاج
✿••✿<><>✿••✿<><>✿••✿
#تـمت_بـأقــلام ✍🏻✍🏻
⚶مجموعة شاعرات أهل البيت⚶
⏪تأسست المجموعة ٧-٢-٢٠١٨⏩
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11

★ أبوذيات ونواعي متعددة لـ ليلة الوحشة ★

★نعي الحدي السريع ((من هجمت خيول العده))★
بوية الحگ العيلة بخطر
ذبحو الحسين وكل هله••
ومذبوح الاكبر والگمر
والحرم تبجي ومعوله••
وگلوبنة تلهب جمر
ونحوم بوية بالفلا••
✍🏻#ام_سيد_علي_المطوري

يبويه يا حيدر علي
احضر تراني موجله••

ذبحو اخواني وكل هلي
حرمه اوحيده بالفله••

لا اخوه ضلت لا ولي
وانه الچنت المدلله••

حرت بيتامى بو علي
اصرخ وانادي معوله••

باچر أسيره وما إلي
كافل ال محمل يعدله••
✍🏻#ام_سيد_يعقوب_الموسوي
✿••✿<><>✿••✿<><>✿••✿

★التغريد الحزين -- طور لفى عاشور -- طور عبدالحي قمبر ((ياجبريل نترجاك))★
نِدَهْتَك يا ابو زينب  ..  تعال وعاين المَنظر
تِحاكيني الزلم واخجل ..  وين اهْلِك يا بت حيدر

بظلام الليل آنه وحدي ..  ودوّر كم طفل وانعى
الكفالة عالنهر ظَلِّت ..  و وِلينه وصُحْبِته صَرعى
محتارة من الشِفته .. ضلوع أمي لَوْن ضُلعه
وخيول اعْداه على صدره .. بحوافِرهم ضّلع كَسَّر

شيّبني الركض واسياط .. ونِدَهتك تحضر العيله
رقيه تِرجف من الخوف .. وجِدَمها احترگت الليله
الرباب من الألم شاحت .. لإبنها اتكَفّنه بشيله
وانه الما شَافَوا خيالي .. بْكُفوفي اثنين انه اتْسَتّر
✍#خادمة_أبي_الفضل

وحشة وبظلام الليل محتارة يضي عيني
أجيت أركض لعند التل كوم أحمي صواويني
أعاين بس حرك الخيام خوية النار تجويني
حيرانه بوسط عدوان النظره سهام ترميني
ماضل والي أتنخاه ولاكفال يحميني
يسيره بنص هضم وسياط بالزجرات يحدين
✍🏻#آلــــّعــلّويِـــه آلّمٌوسويِــــۿ
✿••✿<><>✿••✿<><>✿••✿

★أبوذيات★
وحـش یومـک یبو الیـمه ..علینه
فضی اظلم والحـزن خیم  ..علینه
بگیـنه ابــلازلـــم بــویــه ..علینه
لــون تحضــر یحمــاي الحمیه....
✍🏻#ام_عباس_الحسیني

وحشة ليلتي والدنيا ..ظلمه ((ظلام الليل))
من عندي اخوتي اتذبحو ..ظلمه ((مظلومين))
صرت حرمة وغريبة ابين ..ظلمه ((الظالمين ))
حرت وين التجي هاي المسيـّه....
✍🏻#ولائـية_وافتـخر (دعاء العامري)

غريبة أبلا أهل والليل ..وحشه
أريد أگطع هرش گلبي ..وحشه
ما أنسى الجره والصار ..وحشه
ولا أبطل نواعي المغربيه....
✍🏻#آلــــّعــلّويِـــه آلّمٌوسويِــــۿ
✿••✿<><>✿••✿<><>✿••✿

★نصاري -- زريجي -- عاشوري -- جنوبي وغيرها★
گعدُوا يخْوِتِي ونظروا إليه
تراني والحزن خيَّم عليه
أنا بِنت الوصي وأمي الزچيه
روحي أصبحت بالنار تسعَر

زينبكُم أنا وبحالي شلون
لو أمشي العده بيه يلچمون
أطفال وحرم بيه يلزمون
أذكر كافلي وگلبي يتَفَطَّر

تمنيتك حُسين وياضوه العين
كسرت گليبي خويه ترى نصين
بگيت أنحب أنا وأجهر بالونين
ولاچلمة البگت بس ربي أستَر
✍🏻#زهراء_اللامي
✿••✿<><>✿••✿<><>✿••✿

★مجاريد -- عاشوري وغيرها★
آه آه  آه  يازينب
زينب بل امچاتيل تنخه
بجروحنه تلچم الصبخه
مامن علينه گلوب ترخه
عبااااس گوم الضعن نوخه

خويه
بهيمه ولا نغار ينغر
ياخويه

كونك يخويه تسمع انداي
من غير جودك يحرم الماي
اوجرت نار العطش بحشاي
ياابو الفضل غوّشت عيناي

خويه
غيرك ولا يرهم لخيتك
يبعد اختك

هنيالهه الرافگها اخوها
تباريهه يمنت ابن ابوها
ذله الغرب لو رافگوها
يمنّون من يحمّلوها

بس رفجتك عباس هيبه
ياخويه
لا حول ولاقوة الا بالله العلي العظيم
✍🏻#ام_محمد_الحجاج
✿••✿<><>✿••✿<><>✿••✿
#تـمت_بـأقــلام ✍🏻✍🏻
⚶مجموعة شاعرات أهل البيت⚶
⏪تأسست المجموعة ٧-٢-٢٠١٨⏩
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11

⬛️ إليكم تسلسل منهاج محرم الحرام 2024م 1446هـ لسهولة البحث ماعليكم سوى الضغط على كل رابط يشمل ((قصيدة ثقيلة + فزاعية + أبوذيات ونواعي)) ⬛️

🔴 الهلال ⬇️
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11/26968
•• ━━━━━━━━━━━━━━━ ••
🔴 المسير ⬇️
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11/26974
•• ━━━━━━━━━━━━━━━ ••
🔴 النزول ⬇️
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11/26978
•• ━━━━━━━━━━━━━━━ ••
🔴 العليلة ⬇️
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11/26980
•• ━━━━━━━━━━━━━━━ ••
🔴 ام البنين ⬇️
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11/26984
•• ━━━━━━━━━━━━━━━ ••
🔴 سفير الحسين مسلم ابن عقيل ⬇️
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11/26988
•• ━━━━━━━━━━━━━━━ ••
🔴 أنصار الإمام الحسين ⬇️
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11/26992
•• ━━━━━━━━━━━━━━━ ••
🔴 أولاد مسلم ⬇️
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11/26996
•• ━━━━━━━━━━━━━━━ ••
🔴 قمر بني هاشم مولانا أبا الفضل ⬇️
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11/27000
•• ━━━━━━━━━━━━━━━ ••
🔴 عريس كربلاء القاسم ⬇️
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11/27005
•• ━━━━━━━━━━━━━━━ ••
🔴 علي الأكبر ⬇️
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11/27009
•• ━━━━━━━━━━━━━━━ ••
🔴 عبدالله الرضيع ⬇️
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11/27013
•• ━━━━━━━━━━━━━━━ ••
🔴 ليلة العاشر الوداع ⬇️
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11/27017
•• ━━━━━━━━━━━━━━━ ••
🔴 ليلة الوحشة ⬇️
https://www.tg-me.com/الُشِاْعرَةِوَلُائـيَةِوَافَتْـٌخرَ/com.DoaaAIamry11/27022
•• ━━━━━━━━━━━━━━━ ••
نسألكم الدعاء
🍃 خادمة أهل البيت 🍃
✍🏻#ولائـية_وافتـخر (دعاء العامري)