tg-me.com/sayedhamid9/8356
Last Update:
نزلة للامام العباس عليه السلام
دگ بوق الحرب واتوكل الكافل
مشه بخطوات سيف اعله الرگب نازل
طب سوح الوغى وبكامل الايمان
النصر بي ينقري من عينه باين چان
رجز عباس رجّف قادة الميدان
قبض چفه اعله سيفه وْصوت منهم بان
صوت المن ذاك الصوب / مو حافر دگ اگلوب
ومضم راس النعامة راس اليقاتل
دگ بوق الحرب واتوكل الكافل
معروفه الحرب من تبدي كر وْفر
يكر عباس والوادم تفر اكثر
ابطگته اعداه حت سابع أرض تنطر
يطگ واحسين اله اينادي يخي تشكر
يل چنك حيدر ذاك / شامخ راسك ولواك
زينب بالخيم مبتسمه واتسائل
دگ بوق الحرب واتوكل الكافل
الرماد بعمره ماگابل هبوب الريح
الخاف اليوم مايفزعله جدمه ايطيح
والحل موته هذا اليوم للتوضيح
وگف بمگابل العباس روحه اتصيح
حيره وبيهه شختار / ملك الموت وبتّار
نَزْع الرّوح أخف من سيف ابو فاضل
دگ بوق الحرب واتوكل الكافل
طر صفّينهم وابنصهم اصبح حد
ينعد جيشهم بس عباس ماينعد
خزرهم والْفِكِر بالعگلمي أزيد
تعنّه وْخلگه من الماي چان ابرد
إلمستعصي امن ايام / يم رجله امدنگ الهام
رد وْجِرْبِتَه بيهه النهر شايل
دگ بوق الحرب واتوكل الكافل
رد والجربة صارت أغلى من دمه
العزيز اهواي واجب عالصدر ضمه
ابچفه وعينه انطه وموش بالچلمه
سهم الصاب جوده بْمقتضى الحكمة
من اهد الطف هالجود / يسگي الوادم وايزود
بس لحسين من روحه الگمر عازل
دگ بوق الحرب واتوكل الكافل
خادم الزهراء (ع)
سيد حامد النعيمي
BY قناة الشاعر سيد حامد النعيمي
Warning: Undefined variable $i in /var/www/tg-me/post.php on line 283
Share with your friend now:
tg-me.com/sayedhamid9/8356